13 Jun 2017

Mogolwane wa ofisi ya ditlhopho mo kgaolong ya Mahalapye Bophirima le Shoshong, Rre Boemo Mpolokeng a re puso ya batho ka batho le thokgamo e e renang mo lefatsheng leno di ka nonotshiwa ke tshwaragano le tirisanyo-mmogo ya ba-tsaya karolo mo tsamaisong ya ditlhopho.

Rre Mpolokeng o boletse mo thuto-pusianyong e e neng e tsenwe ke mapodisi mo Mahalapye bosheng gore le fa mapodisi, babega-dikgang le baemedi ba diphathi tsa sepolotiki ba na le tshwanelo ya go tlhopha, gone ba tshwanetse go sala molao morago go na le go supa kgatlhego mo diphathing dingwe.

A re maikaelelo a  thuto-puisanyo eo e ne e le go abelana megopolo le ba sepodisi ka e le bone ba theogelang ka letsatsi la ditlhopho go bona gore ditlhopho di tsamaya ka thelelo le go sireletsa ba ba tlhophisang gammogo le batlhophi.

Rre Mpolokeng o tsweletse ka go bolelela ba-tsena thuto-puisanyo gore go le gantsi dintwa tse di diragalang mo mafatsheng mangwe a Afrrika di bakwa ke ditumelo tse di farologanyeng le go dirisa semorafe.

A re mo ditlhophong tse di tlang tsa setshaba batlhophi ba tlaa dirisa motshine go tlhopha bontlhopheng ba dikgaolo tsa bone a bo a bolela fa mo ditlhophong tseo ga go ke go nne le ikwadisetso ditlhopho ya tlaleletso jaaka go ntse go diragala.

O tlhalositse fa Motswana mongwe le mongwe yo o nang le Omang yo o mo tirisong e bile a le dingwaga tse di lesome le boferabobedi a na le tshwanelo ya go tlhopha le go emela ditlhopho go sa kgathalesege gore ke wa tumelo efe kana morafe ofe.

Rre Mpolokeng o tsweletse ka go tlhalosa fa lefatshe la Botswana le tshwara ditlhopho nako le nako morago ga ngwaga tse tlhano.

A re mo ditlhophong tse di tlang  bontlhopheng ba bopalamente ba tlaa ikwadisetsa ditlhopha ka P5 000 fa bontlhopheng ba dikhansele ba tlaa ntsha P1000.

A re mo ditlhophong tse di tlang tsa setshaba bontlhopheng ga ba na go letlelelwa go adimana basupi ka letsatsi la ikwadisetso ditlhopho jaaka go ntse go direga mo ditlhophong tse di fetileng.

A  re ba santse ba sekaseka mogopolo wa gore bagodi, ba-na-le bogole le bomme ba ba itsholofetseng ba ka seke ba letlelelwe go tlhopha nako e le nngwe le badirelapuso go hema mosuke le mela e meleele ka letsatsi la ditlhopho. BOKHUTLO