22 May 2017

Sekole se sebotlana sa Malaka kwa kgaolong ya Tswapong se ne sa  ipelela phenyo mo ditlhatlhobong tsa lokwalo lwa bosupa tsa ngwaga o o fetileng.

Sekole se se tsere maemo a bobedi mo kgaolong ya Palapye ka 95 per cent mo ditlhatlhobong tsa lokwalo lwa bosupa.

Mogolwane mo lephateng la ditsela le pabalesego, Rre Bokhutlo Modukanele o roletse bana ba sekole seo ba ba neng ba pasa lekwalo la bosupa ngogola hutshe ka Labotlhano.

A re se se supa tshwaragano fa gare ga batsadi ba Malaka le barutabana, a kgothatsa bobedi joo go tswelela ba bereka ka tshwaragano.

A re o itemogetse maduo a mantle a sekole seo mo dingwageng tse tharo tse di fetileng, a re fa ba ka tswelela ka mowa wa tshwaragano sekole seo se tlaa tswelela ka go tlotlomatsa Malaka le go tsisa ditlhabololo.

A re Malaka o ka tlhabololwa ke bana ba motse oo, a tlhalosa fa motse oo o kgonne go ntsha barutegi ba ba romilweng ke puso mo makalaneng a a farologaneng.

A re se e tshwanetse go nna thotloetso mo baneng ba Malaka gore le bone ba tsoge ba nna babereki ba tlhwatlhwa.

A re Malaka o santse a tlhoka dingaka, babueledi, le ba maranyane, a tlhalosa fa se se ka kgonagala fela fa bana ba sekole sa Malaka ba ka tsaya thuto ka tlhoafalo.

O kgothaditse batsadi go tsaya karolo mo thutong ya bana, a re fa bana ba fiwa thotloetso ba tlhoafalela go ithuta.

A re batsadi bangwe ga ba tsee boikarabelo jwa go bona gore bana ba tsena sekole sentle, a re bangwe ba tlogela bana ba tlogela sekole ba santse ba le bannye.

A re ngwana o nna se motsadi a eletsang gore a nne sone, a tlhalosa fa tiro ya barutabana e le go rotloetsa maikaelelo a batsadi.

A re malatsi ano bana ba tswa mo tseleng, a tlhalosa fa bangwe ba tsisa dilo tse di bogale kwa sekoleng go lwantsha ba bangwe.

O kopile batsadi go kgalema bana gore ba tsamae mo ditseleng tse di siameng tse di elediwang ke setshaba.

O akgotse barutabana ba sekole seo ka go ntsha maduo a mantle, a re ba tswelele ka go dira ka bonatla gore ba dire go feta fa.

A re morutabana o dira tiro e e bokete ka gore ke ene a simololang le motho a santse a le monnye mme a bope motho gore e tsoge e nna motho yo o botlhokwa mo setshabeng.

O lebogile puso go simolodisa lenaneo la thuto ya matlhagolelo e ka yone bana ba simololang sekole ba santse ba le bannye gore ba tsene mo lokwalong lwa ntlha ba fatlhogile.

Fa a tswa la gagwe, mogolwane mo lephateng la thuto mo kgaolwaneng ya Palapye, Mme Susan Thitoyamore o lebogile mokwaledi mogolo wa ga Tautona Rre Carter Morupisi le ba lelwapa lwa gagwe go nna le seabe mo go rotloetseng thuto mo sekoleng sa Malaka.

O roletse boora Morupisi hutshe ka go rotloetsa sekole sa Malaka ka lenaneo la itseele sekole, a re fa e sale ba itseela sekole sa Malaka maduo a sekole seo a ile kwa godimo.

O lebogile boeteledipele jwa sekole sa Malaka a re ba emetse sekole seo ka dinao, a re boeteledipele bo tshwanetse go itse gore go diragala eng mo matlong a borutelo.

Fa a tswa la gagwe, mogokgo wa sekole seo, Mme Ipelegeng Paseka o lebogetse thotloetso e a e fiwang ke barutabana, boora Morupisi le ba lephata la thuto.

A re o dira tse tsotlhe go thusa sekole sa gagwe gore se ntshe maduo a a kwa godimo, a re o tsaya nako ya gagwe phakela le phakela a ruta bana ba lokwalo la bosupa go kwala dipolelo le makwalo e le go ba thusa go ipaakanyetsa ditlhatlhobo. BOKHUTLO