17 May 2017

Mapodisi a Letlhakane mo kgaolong-potlana ya Boteti a tlhotlhomisa tiragalo e mo go yone monnamogolo wa dingwaga tse di masome a supa a fitlhetsweng a tlhokafetse mo sekgweng.

Go ya ka mothusa mogolwane wa mapodisi a Letlhakane Assistant Superintendent Lesego Ndebele tiragalo e e diragetse kwa merakeng ya Tswantsha  mo lekgadikgading gaufi le Mmatshumo.

Rre Ndebele  a re  go bolelwa fa monnamogolo yo a ne a emeletse mo lwapeng phakela ka Sontaga mme a seka a boa maitseboa, mme ya re  letsatsi le le latelang ba ba nnang le ene ba tlhobaela, ba mo lata ka motlhala ba fitlhela a tlhokafetse, go bonala masuputso le metlhala ya ditlou go bapa le ene.

Assistant Superintendent Ndebele a re  ba ne ba begelwa mme ba fitlhela tiragalo eo mme  ba mo tsaya ba mo isa ko sepateleng ko dingaka di fetileng tsa rurifatsa fa a tlhokafetse.

A re setopo sa gagwe se ko setsidifatsing se letetse go tlhatlhobiwa ke dingaka. BOKHUTLO