16 May 2017

Seabe sa setshaba ke se segolo mo go thuseng mapodisi go lwantsha borukutlhi.

E rile a bua mo puisanyong le BOPA, mookamela sepodisi sa Mochudi, Senior Superintendent Kevin Mookodi a tlhalosa fa borukutlhi jo bo diragalang bo ka thibelwa fa setshaba se ka tshwaragana.

Superintendent  Mookodi a re ba tshwenngwa ke go bo batho ba bapile mme ba sa buisane e bile ba sa kgathale ka se se diragalang mo ditikologong tse ba nnang mo go tsone.

A re fa go ka nna le kutlwano fa gare ga baagisanyi go ka nna motlhofo go simolodisa le go tsweledisa ntebele ke go lebele.

Le fa go ntse jalo, o tlhalositse fa e le ba sepodisi ba dira ka natla go lwantsha borukutlhi ka kakaretso.

A re mo nakong e e fetileng ba kgonne go busetsa seemo mo taolong e bile ba santse ba kgona go lwantshana le methale ya borukutlhi ka bontsi.

Ramapodisi a re mo dikgweding tsa Hirikgong go fitlha ka Mopitlo ba kwadisitse dikgang tsa go thujwa ga matlo bosigo di le 16 fa tsa go thujwa  ga matlo motshegare di le 33 a tshwantshanya le dikgang di le 10 tsa go thujwa ga matlo bosigo di le 43 tsa go thujwa motshegare.

A re ngogola ka tsone dikgwedi tsa Hirikgong go fitlhelela Mopitlo ba kwadisitse dikgang tsa go thujwa ga madirelo di le 14 fa ba kwadisitse di le 22 monongwaga.

Senior Superintendent  Mookodi a re ba kwadisitse dikgang tsa go kgothosa ka dikgoka  di le 14 ngogola mme ba kwadisa di le tlhano monongwaga.

Mo go tse dingwe, Rre Mookodi a re ba kwadisitse melato ya dipolao e le meraro ngogola mo dikgweding tsa Hirikgong go fitlhelela Mopitlo fa monongwaga ba kwadisitse di supa.

Ba kwadisitse dikgang tsa dipetelelo di le 21 ngogola fa monongwaga di le 20 mme tsa bogodu jwa leruo di ne di le 39 ngogola fa ba kwadisitse 32 monongwaga.

O tlhalosa fa ba itemogetse dipalo tse dintsi tsa batho ba ba tsamayang ba anwa bojalwa mo ditseleng, selo se a rileng ke molato, a tlatsa ka go re dikgang tsa bagwebi ba bojalwa  ba ba sa obameleng dinako tsa thekiso le tsone ga di kalo.

Senior Superintendent Mookodi o tlhalositse fa ba gasa melaetsa ya twantsho borukutlhi ka go buisa diphuthego tsa kgotla, go tsamaya ba etse seemo tlhoko mo mebileng bosigo le motshegare, a re ba bereka le dikomiti tsa baithaopi ba ba thusang sepodisi.

A re ba leka ka thata go rotloetsa boeteledipele jwa motse go ruta setshaba le go se rotloetsa go tlhama dikomiti tsa ntebele ke go lebele, a tlhalosa fa ba setse ba itemogetse fa dikgotla tse di nang le mekgatlho ya go nna jalo di sa tshabelelwe ke borukutlhi.

Rre Mookodi o ne gape a gatelela botlhokwa jwa go kgalemela bana, a re batsadi ba seka ba buelela bana fa go belaesega ba dirile borukutlhi.

A re mo Mochudi ba itemogetse fa banana bangwe ba tshwenya ka go phamolela batho, segolo jang bomme dibeke.

O ne gape a gatelela fa go le gantsi dirukutlhi e le batho ba ba itseweng mo setshabeng mme ba bipiwa, selo se a rileng ga se thuse ka dirukutlhi tseo di tswelela ka go tlhorontsha sone setshaba se se di bipang.

Senior Superintendent  Mookodi o ne a supa fa ba tshwenyegile ke dikgang tsa borukutlhi kwa dikgotleng tsa Boseja, Makakatlela, Pilane, Bokaa le Phaphane, tse a rileng ke tsone di gogang kwa pele mo dikgannyeng tsa borukutlhi mo Mochudi, ka jalo a gwetlha setshaba go tshwaragana le sepodisi go lwantsha dikgang tsotlhe tsa borukutlhi. BOKHUTLO