18 Apr 2017

Ka Kitso Simon
Banni ba Mokgware ba re ga ba ye go tlhopha mo ditlhopng tse di tlang fa ba ise ba bone tsela, motlakase le metsi, tse ba tswang goo-Lowe ba ntse ba di kopa mme go se nko e tswang lamina.

Ba ntshitse matshosetsi ao mo phuthegong ya kgotla e buisiwa ke Mopalamente Pelonomi Venson-Moitoi.

Ba re ga go na ka fa motse wa bone o ka tlhabologang ka teng kwa ntle ga metsi, motlakase le tsela.

Ba ne ba kopa go tlhalosediwa gore ka tsela e ba e kopang e le sekgala sa dikhilomithara tse di lesome fela, gatwe mathata ke eng e ka seke e dirwe.

Ba ne ba kopa gore mopalamente a laletse Tautona go tla go bua le bone ka mathata a motse pele ga a tlogela tiro.

Kopo eo e ne ya buiwa gape le kwa Mogome gore Tautona a lalediwe.

Ba Mogome bone ba ne ba itumelela ditlhobololo tse di teng mo motseng ba re metsi, mooki le madi a kgaolo a P10 million ba di bone, mme ba galaletsa moplamente ba re ke mme wa motia yo o kgonang go ema le borre.

Ba re ipapatso ya AU e ne e le e e mashetla thata mme ga a a ka a ipona tsapa, go supa fa le ene a nonofile, e bile a na le bokgoni, mme ba ne ba mo akgolela bopelotheri joo.

Ba ne gape ba supa metsi a ba a sielweng a le teng le fa a sa ntse atswa a le mahibidu.

Banni ba metse eo ba ne ba ngongorega ka tshenyo ya leruo mo masimo, ba re e ba ntshitse fela baitshopere, mme ba ikuela gape le ka ditlou tse di mo kgaolong ya bone gore ga di ba jese diwelang ka ba nna fela ka letshogo.

Balemi ba ne ba kopa diofisi tsa puso kwa Mogatsapoo, le gore BMC e reke dikgomo tsa bone ka ga go na kwa barekisang teng.

Gape ba ne ba bua ka terata ya kgaoganyo masimo le mafudiso ba re e kgologolo e tlhokana le go tsosiwa go kganela leruo go senya mo masimo ka nako tsa temo.

Ba ne gape ba re go turu go latela madi a bagodi kwa Mahalapye, ba kopa gore go dirwe sengwe go ba thusa.

Ba ne gape ba re dipalo tsa Ipelegeng di dinnye ka e bile ba dikgaogana le batho ba ba kwa masimo, le fa mathata a bakwa gape ke bana ba ba sa tseneng dikole ba feditse form 3 le 5, mme go se na se ba se dirang.

Ba re puso e tumetse BOCODOL fa ba ka ikoketsang teng.

Ba koporase ya metsi bone ba re ba tlaa ntsha dipompo tse di rusi ba tsenya di sele.

E rile a tswa la gagwe morago ga ditekodiso tseo, Mopalamente Venson-Moitoi a supa fa go na le mafelo a Tautona a iseng a a etele, mme bone ba le botoka ka o kile a tla, fela a re o tlaa fetisa kopo ya bone.

Ka dikgang tsa tsela, metsi le motlakase tsa Mokgware, o ne a supa fa a ne a laletsa Tautona, a bo a kopa gore a tsamaye ka koloi e seng sefofane, maikaelelo e le gore a e bone.

Ka metsi o rile ba tlaa gokelelwa metsi mo bogaufing ka go nnile le mathata a gore rakonteraka o ne a seka a akaretsa dimpompo le bustara ka nako ya fa a neelwa tiro eo ya kgokelo ya metsi.

Mme Venson-Moitoi a re tsela yone e tlaa tshelwa lekgarapana le borogo bo tlaa dirwa go fitlhelela madi a nna teng a gore e tshelwe sekontere jaaka ba kopile.

Mme o ne a supa fa dipalo tsa bone le tsone di busetsang ditlhabololo tsa motse morago, a re ditlhabololo gantsi di akanyediwa go lebilwe dipalo.

Maphata a puso ka go farologana ba ne ba supa fa ba tsibogela dikgang, jaaka tsa ditlou tse di mo motseng oo, mogolwane wa lephata la diphologolo, Rre Thatayaone Tshekiso o ne a supa fa puso e dira gotlhe go somarela matshelo a batho, a bo a supa fa jaanong diphologolo tse di borai jaaka tau, tlou, nkwe le nare go ya go phimolwa batho keledi ka P70 000 fa di bolaile motho.

Gape baagi ba tlhaloseditswe ka tiriso motshine wa ditlhopho, mananeo a banana, le gore ba tlhokomele leruo. BOPA