09 Jan 2013

Baagi ba kgotla ya Xhosa kwa Mahalapye ba supile matshwenyego ka kgolo ya borukutlhi kwa kgaolong ya bone.

Ba buile jalo mo phuthegong ya kgotla e e neng e tshwerwe ke mothusa tona wa dikgaolo le tlhabololo ya magae e bile e le mopalamente wa Mahalapye botlhaba, Mme Botlogile Tshireletso kwa kgotlaneng ya Moloko kwa Mahalapye.

Ba re borukutlhi joo bo diragala gantsi fa matamong, e le jo bo amang dipodi le dikgomo.

Ba ngongorega gore mapodisi a diegela go tsiboga.

Ba supile fa dirukutlhi dingwe e le banana mme batsadi bangwe  ba di ema nokeng.

Mme Tshireletso o kgadile a sa kgwe mathe batsadi ba ba emang le bana mo borukutlhing a supa fa e le go tlhoka boikarabelo.

Inspector Basuti Mmereki wa sepodisi sa Mahalapye o kaile fa fa go na le tlhaelo ya dikoloi ka jalo ba tsaya nako go tsiboga fa ba begelwa dikgang tsa borukutlhi. Bokhutlo