14 Mar 2017

Mogolwane wa lephata la thuto mo Kweneng, Rre Mokwadi Tese o rotloeditse bana ba sekole se segolwane sa Sojwe mo kgaolong potlana ya Letlhakeng go tsaya thuto ka tlhoafalo.

Rre Tese o buile se mo phuthegong ya bana le barutabana ba mephato wa boraro bosheng.

O kgothaditse bana go nna le kutlo mo batsading le barutabana, le go bulela dipelo dilo tse di siameng jaaka boitshwaro jo bo eletsegang gore ba pase. O boletse fa sengwe le sengwe se ngwana a se dirang fa a santse a le monnye se gola le ene, ka jalo go botlhokwa go itlwaetsa go dira tshiamo ba sa le babotlana.

Rre Tese o ne a gatelela sekai se ka go re magodu a leruo a simolotse ka go utswa moro kgotsa setoki sa nama. A re boitshwaro bo tshwana le go nna dinalanyana bo simologa mo ngwaneng a santse a le monnye mme bo gole le ene.

Rre Tese a re ngwana yo o sa utlweng molao wa batsadi le barutabana, o kgotlela tikologo e a tshelang mo go yone ka o ruta ba bangwe boitshwaro jwa gagwe.

Le fa go ntse jalo, o supile fa boitshwaro jo bo sa letlelesegeng jo, bo le motlhofo go tswa mo ngwaneng fa a emelwa ka dinao a sa le mmotlana ka a re lore lo ojwa lo sale metsi. O kgadile a sa kgwe mathe batsadi ba a reng ba omanya bana nako le nako le fa baya sekoleng tota, mme a re selo se  se dira gore fa go rutwa ngwana yo a seka a anywa sepe.

O tlhalositse fa ngwana yo o kgothadiwang moso le moso fa a ya sekoleng a dira sentle ka a itse gore go solofetswe maduo a a itumedisang mo go ene.

O ne a tswelela ka go rotloetsa bana go tlotla batsadi ba bone ka a re ga ba kitla ba ba eleletsa bosula fa e se tswelelopele fela.

A re batsadi ba bua mo boemong jwa Modimo, mme yo o sa ba reetseng a tlaa timela mo tsamaong ya nako mme a iphitlhele a pholethamo fifing ka a tlhokile go reetsa Modimo.

Rre Tese o ne a tswelela ka go rotloetsa bana go ipaakanyetsa isago ba santse ba le mo sekoleng.

E rile a mo kgwa kgaba, moeteledipele wa komiti e e emetseng bana ba sekole, Kaone Motlhanka a kopa balekane ba gagwe go boloka mafoko a ga Rre Tese mo dipelong tsa bone. BOKHUTLO