12 Feb 2017

Maitiso a mmino wa Polka o o tumileng kwa Kgalagadi  Borwa  a tlaa tshwarelwa kwa Tsabong  ka Matlhatso, (February 18).
Go ya ka mogolwane go tswa mo lephateng la banana, metshameko le ngwao mo Kgalagadi, Rre Mpilo Mbo mo puisanyong le BOPA  bosheng, go na le komiti e e setseng e simolotse go baakanyetsa maitiso ao e bile dipaakanyo di tsweletse sentle.
Rre Mbo o supile fa mmino oo o ratwa bobe ke banni ba kgaolo eo e bile  mo  nakong ya gompieno o setse o kgatlhegetswe ke ba dikgaolo tse dingwe ka go tsena dikgaisanyo tsa malatsi a ga Tautona ngwaga le ngwaga.
O kaile fa mmino wa Polka o setse o godile mo lefatsheng leno  ka mo nakong ya gompieno ditlhopha di setse di le masome mararo go tswa kwa go tse nne tse dikgologolo.
 Rre Mbo o kaile fa maitiso a Polka a simolotse go tshwarwa ka 2012 e le tsela nngwe ya go kgobokanya badiragatsi golo go le gongwe, bogolo jang ba mmino oo go ipapatsa le gone go epolola  botswerere jwa bone.
Rre Mbo o boletse fa e ne ya re ka 2015 ba lephata leo ba tsaya boikarabelo go rotloetsa le go ema nokeng ba mmino oo ka go ne go lebega ba sa atlege ka ntlha ya letlhoko la madi.
O kaile fa e le lekgetho la borataro maitiso ao a ntse a tshwarwa mo kgaolong.
A re ba solofetse ditlhopha  di fera bobedi tse di neng di gaisitse tse dingwe mo dikgaisanyong tsa kgaolo ngogola tse di neng di  tseneletswe ke ditlhopha tse di farologanyeng go ralala lefatshe leno ka bophara.
A re ditlhopha tseo di tlaa atswiwa ka ka P4 000 setlhopha  sengwe le sengwe e le tsela nngwe ya go ba tiisa moko go tswelela ba dira ka natla.
Rre Mbo o  boletse fa bangwe ba ba laleditsweng ke Tautona  e le bana ba sekole se se botlana sa Mokatse  ba ba neng ba kgatlha leitlho la gagwe mo lengweng la maeto a gagwe lwa go buisa diphuthego tsa kgotla ba patilwe ke ba sekole se sebotlana sa Tsabong.
Rre Mbo a re gape ba laleditse setlhopha se se tumileng ka mmino wa setso sa Magebula go tla go jesa monate balebeledi.
A re maikaelelo magolo a maitsiso ao ke go rotloetsa ngwao, go okela bajanala mo lefatsheng leno le gone go rotloetsa bagwebi ba babotlana ka ba ka kgona go nwa maitisong aomoro.
Rre Mbo o boletse fa Tautona Lt Gen. Dr Seretse Khama Ian Khama a paitlwe ke matona a puso le bodiredi jwa puso jwa maemo a a kwa godimo ba solofetswe go tsena moletlo oo.
E re ka jaana go tlaa bo go tsenwa mahala kwa lobaleng lwa ditshupo, Rre Mbo a re ba solofetse dipalo tse di kwa godimo tsa barati ba mmino oo go ya go  intsha bodutu. BOKHUTLO