12 Jan 2017

Mokhanselara wa Tsetsebjwe, Rre Lame Motsamai o galaleditse badirelapuso ba Tsetsebjwe go bo ba bereka ka mashetla ba le seopo sengwe.

 Rre Motsamai o buile jalo kwa moletlong wa ipelelo tshwaragano ya badirelapuso ba Tsetsebjwe o o neng o tshwere kwa kokelwaneng ya motse oo ka Matlhatlhatso.

 Mokhanselara o tlhalositse fa Tsetsebjwe a le sego go nna le badirelapuso ba ba berekang ka natla e bile ba na le mowa wa tirisanyommogo le tshwaragano.

A re badirelapuso ba Tsetsebjwe ba kgona go amogana didirisiwa tsa puso di tshwana le dikoloi fa ba lemoga fa maphata a mangwe a na le tlhaelo.

Tsetsebjwe o na le lephata la botsogo, mapodise, ba dikgolegelo, melelwane le ba sesole.

Mokhanselara Motsamai a re tshwaragano le tirisanyommogo ya badirelapuso e dirile gore banni ba Tsetsebjwe ba kgotsofalele ditirelo tsa puso tse  ba di neelwang ke maphata a ka go farologana.

 O boletse fa tirisanyommogo ya badirelapuso le bogogi jwa Tsetsebjwe e le sengwe sa dilo tse di dirang gore ba atlege mo tirong ya bone.

Rre Motsamai o kgothaditse badirelapuso ba go tswelela  ba bereka ka natla le tshwaragano gore ba nne sekao mo badirelengpuso ba metse e mengwe mo lefatsheng leno.

O feditse ka go ba solofetsa fa a tlaa ba ema nokeng mo ditirong tsa bone ka go farologana ga mmogo le go isa matshwenyego a bone kwa go ba ba maleba.

Kgosi Kgosidialwa Motsamai o galaleditse badirelapuso ba go bo ba bereka ba tshwaragane ka nako tsotlhe.

Kgosi Motsamai a re tshwaragano ya badirelapuso ba Tsetsebjwe e melediwa mathe ke banni ba metse e mengwe.

A re fa go nang le tshwaragano teng tiro e dirwa ka bokgabane, ka jalo a gakolola badirelapuso go tswelela ba thusana go rarabolola dikgwetlho tse ba kopanang le tsone mo ditirong. BOKHUTLO