10 Jan 2017

Kgosi Shepard Pelaelo wa Natale o gakolotse banni ba motse oo go dirisa mananeo a puso a maikaelelo a one e leng go tlhabolola bonno.

Kgosi Pelaelo o buile jalo mo potsolosong a supa fa a tshwenngwa ke go bona dingwe ditsha di fetogile matlotla ka mabaka a go tlhoka go tlhabololwa ntswa di na le lobaka di abilwe. A re mananeo a akaretsa la SHHA le la Turnkey ke metswedi e e ka ba sologelang molemo.

Kgosi Pelaelo a re le ntswa mangwe mananeo a a tsaya lobaka gore moikopedi a bone phetolo, go botlhokwa go leta ka tsholofelo go na le go tshabela kgakala.

A re mangwe mabaka a a diang phetolo ke gore go a bo go santse go dirwa ditshekatsheko tse di maleba mabapi le baikopedi ka go farologana.

Kgosi Pelaelo a re ditsha tse di sa tlhabololweng ke tsone tse di felelang di rekisiwa le gone ka tlhwatlhwa  tse di kwa tlase.

O bile a re morago  ga thekiso ya tsone ditsha tse, beng ba tsone ke bone  gape ba felelang ba tshwenya puso ka go tlhoka bonno. Kgosi Pelaelo o bile a bolela gore dingwe ditsha tse di fetogileng matlotla di fa gare ga motse, ka jalo di dira gore bontlha bongwe jwa motse bo seka jwa kgatlhisang.

Gape o bolela fa mangwe matlotla a a fetogile boremelelo jwa borukhutlhi gape a mangwe a rotloetsa kgotlelesego ya tikologo.  A re bangwe ba felela ba ithomela mo go one matlotla a.

Kgosi Pelaelo o bile a re  ntswa dingwe ditsha di fetoga matlotla ka mabaka a gore beng ba tsone ba tlhokafetse, thulaganyo e e maleba e ka dirwa ke ba masika go bona gore ditsha tseo di ka tlhokomelwa jang.

Go sale foo, Kgosi Pelaelo  a re mananeo a nyeletso lehuma a akaretsa la thuo ya dihutshane ke mangwe a a dirang sentle e bile  pharologanyo e a bonala mo matshelong a beng ba one.

A re bontsi jwa banni ba motse ba na le kgatlhego ya ditshingwana tsa merogo mme maiteko a bone a busediwa morago ke gore mapakwana a a dirang moriti wa ditshingwana a tshabelelwa ke go jewa ke motlhwa.

A re se se  dira gore go tlhokwe se se tshegetsang moriti mme morago dijalo di felele di babalelwa ke letsatsi le diji ka go farologana.

Kgosi Pelaelo o bile a supa fa a sa itumedisiwe ke didirisiwa tsa mananeo tse di tlang di sa felela. BOKHUTLO