10 Jan 2017

Mme Mphonyana Mogomotsi wa dingwaga tse di masome matlhano le borobabongwe, ga a ipone tsapa go galaletsaThuto Ga E Golelwe a e tlhakantse le Nyeletso Lehuma.

Mme Mogomotsi, yo o tlholegang kwa Manyana kwa kgotleng ya Kgosing, o boleletse BOPA gore e rile go lemoga fa go tlhoka go itewa seatla go tlaa mo jesa leswe, a inaakanya le go tsena sekole.

Mme Mogomotsi a re o simolotse go tsena Thuto Ga E Golelwe ka 2012 mme ya mo neela botsipa le bonokopila jwa go ithuta kgwebo, go bala le go kwala le gone go tlhakanya tota, a tlatsa ka gore e fetotse botshelo jwa gagwe ka tsela e e gakgamatsang.

A re e ne ya re morago ga ngwaga a kgona go ikopela dithuso tsa nyeletso lehuma ka a ne a setse a na le lesedi la thuto, mme a atlega a thusiwa ka metshine le dipitsa tse nne go simolola kgwebo ya go dira semota borotho sa lerotse, atchar le maungo a a omeleditsweng.

Mme Mogomotsi a re o tlhotlheleditswe ke lorato lwa kapei go simolola kgwebo e.

A re o rekisetsa dikole tse dipotlana le batho ba motse. A re semota borotho sa gagwe se ratwa thata ke bana le bagolo, a tlatsa ka go re mo bogompienong Kgwebo e tsamaya ka thelelo ka bareki ba ntse ba tla ka mmetela, mme se se mo nametsa pelo.
Mme Mogomotsi o ne a tlhalosa fa a ikgapetse sekete le makgolo a mane a pula mo dikgaisanyong tse di farologanyeng tse di fetileng tsa Thuto Ga e Golelwe.
O ne a leboga thata mananeo a puso ka a kgona go fetola botshelo jwa motho. “Ke rotloetsa bomme gore ba emise go baya mo banneng ba bone ba itshwarele ka diatla ba le aramele le santse le tlhabile.” BOKHUTLO