09 Jan 2017

Kgosi David Toto ll  wa Tsabong o rotloeditse morafe wa gagwe go sola molemo bokgola jwa  dipula tse di setseng di simolotse go na mo kgaolong ya Kgalagadi Borwa.

Kgosi Toto, yo e bileng e  le moemedi wa kgalagadi  kwa Ntlo ya Dikgosi, o ntshitse thotloetso mo potsolosong le BOPA ka bosheng, a re go na ga pula ke selo se se itumedisang thata ka gantsi  kgaolo eo e tshabelelwa ke komelelo  le mogote.

Kgosi  Toto II o ne a gakolola le go rotloetsa balemi go teratelela masimo go itsa loruo go ba senyetsa fa ba setse ba lemile.

O ba gakolotse go lema dijalo tse di siametseng  kgaolo eo di tshwana le dinawa, mmidi, marotse le magapu.

A re  bogologolo balemi mo kgaolong eo  ba ne ba kgatlhegela temo ka pula e ne e na ka  selekanyo se se kwa godimo, mme ba ne ba felela ba kgojwa marapo ke dipula tse di boutsana le mogote ntlha ya diphetogo tsa loapi.

Kgosi Toto II o ne a gakolola ba ba senang masimo go lema merogo le tse dingwe mo digotlong le gone go thusana le ba ba nang le masimo gore ba tle ba obe letsogo.

A re bagologolo ba ne ba na le lorato, tshwaragano le tirisanyommogo e e kwa godimo ka go ne go sena ngwana ope  yo o neng a ka  lala le tlala baagisanyi ba na le se se ka jewang.

Fa  a bua ka loruo o boletse fa pula e setse e nele e  tladitse megobe le dipane mme seo se tlaa imolola barui ba kgaolo eo mo letlhokong la metsi le phulo.

O ne a gakolola batsadi go itsa bana go ya go tshamekela kwa megobeng ka go le borai ba ka felela ba betwa ke metsi.

 Mo potsolosong e nngwe, meteledipele mo lephateng la tepo loapi mo Tsabong, Rre Kabelo Rakanyane o boletse fa paka ya pula e simolola ka Phalane go fitlha ka Mopitlo.

Rre Rakanyane  o boletse fa pula e le ntsi mo Kgalagadi Borwa.

A re tsholofelo ke gore e tlaa tswelela e na ka bokete fa ba tshwantshanya le ngogola.

O ne a gakolola setshaba go ela tlhoko matlo a bone a ba a pegileng matlapa kwa godimo ga disenke, a re go ka felela go baka dikgobalo, bogolo jang ka mo gongwe pula e na e le mashetla ka diphefo.

A re tshenyo ya pula mo gongwe e bakwa ke ka fa dikago di agilweng ka teng le gore di agilwe fa kae le gore lefatshe le ntseng jang. BOKHUTLO