08 Jan 2017

 Kgosi wa motse wa Mmatshumo mo kgaolong ya Boteti Rre Keletshwaretse Phetsogang a re o tshwenngwa ke thekiso ya majalwa a a dirwang mo malwapeng mo motseng wa gagwe.

Kgosi Phetsogang o buile jalo mo potsolotsong le lekalana la dikgang la BOPA a tlhalosa fa majalwa a a  tshwenya  ka gore barekisi ba  majalwa ao  ba simolotse go tlhoka go obamela molao wa thekiso ya one.

Kgosi Phetsogang o boletse gore barekisi ba majalwa a ba bula dikgwebo tsa bone go fitlhela nako e e beilweng ya go tswala e feta.

O tsweletse ka gore fa ba molao ba tswala marekisetso a majalwa, barekisi ba bojalwa ba a ikuela ba re ba a kgokgontshiwa ka gore ba metse e mengwe e e mabapi ba kgona go rekisa majalwa a bone go tlola le nako e e beilweng ya go tswala.

Rre Phetsogang o tladitse ka gore banni ba motse wa Mmantshumo ba seka ba itshwantshanya le ba metse e mengwe ka gore motse mongwe le mongwe o na le tsamaiso ya one.

A re  go laola thekiso ya majalwa a a dirwang mo malwapeng  go thusa gore go nne le molao le tsamaiso e e lolameng mo motseng.

Kgosi Phetsogang o ntshitse letshwenyego la gore badiri ba majalwa a a dirwang mo malwapeng ba tlhakanya metswako e e sa letlelesegeng e bile e le diphatsa mo botsogong jwa banwi ba majalwa a, a tswelela  ka gore ba tshwanetse ba tsenya metswako e e tlhomamisitsweng, go sa nneng jalo ba tlaa tseelwa dikgato tse di maleba.

 Rre Phetsogang a re Batswana ba tshwanetse ba emisa go nwela majalwa mo mafelong a a sa tshwanelang.

O tsweletse a re mo motseng wa Mmatshumo, ba tshwenngwa ke batho ba ba nwelang majalwa fa thoko ga makadiba, a re banwi bao ba felela ba thuma mo go one,   a re go dira jalo go diphatsa ka gore makadiba ao a nna dinoga mo teng e bile ba kgotlela metsi a a nowang ke leruo le batho.

Kgosi o tsweletse a re batho ba ba  nwelang fa makadibeng a ba  dira mafelo a teng leswe. BOKHUTLO