21 Dec 2016

Banana ba Boteti Peer Theatre Group (BPTG) ba itlamile go tsosolosa ngwao ka bodiragatsi jwa metshameko ya mo seraleng.

Morulaganyi wa setlhopha seo, Mme Gofaone Molaletsi, a re ba lemogile gore go tletse ditlhopha tse dintsi tsa moopelo le diletso mo kgaolong ya Boteti, mme  tse di diragatsang mo seraleng di le palo-potlana.  

A re ka jalo  ba ne ba bona go le maleba gore ba atolose  bodiragatsi jwa motshameko wa drama mo kgaolong ya bone.

Mme Molaletsi o tsweletse ka gore bodiragatsi bo ka thusa banana go lwantsha lehuma  gore ba seka ba ikaega ka puso.

O tsweletse a re  ba ne ba bona go le botlhokwa gore ba dire thuto-puisano e mo go yone ba tlaa ba rutuntshang mo go tsa bodiragatsi ja mo seraleng.

A re maikaelelo ke go ba rutuntsha ka bodiragatsi mme ba  remeletse thata mo metshamekong e e rutang ka ngwao ka jaana moono mogolo e le go tsosolosa ngwao ya Boteti.

Mogolwane wa mananeo wa lephata la banana metshameko le ngwao Mme Itemogeng Solomon a re badiragatsi ba Boteti Peer Theatre Group ba bone thotloetso mo lephateng la bone.

O tsweletse ka gore banana bao ba rulaganyeditswe baitseanape le barutuntshi go tswa Gaborone.

Go ya ka Mme Solomon, banana ba BPTG ke baemedi go tswa mo metsaneng yotlhe e e mo kgaolong-potlana ya Boteti, a re ba solofela gore fa banana ba feditse ka thutuntsho ya bone, ba ye go ruta banana ka bone mo metseng e ba tswang ko go yone.  

Rre Mandla Pule yo e leng mongwe wa baitseanape mo go tsa bodiragatsi ja mo seraleng, o tlhaloseditse banana ba BPTG gore ba ka kgona go atlega mo bodiragatsing, fa ba  ka itse  ka fa metshameko e rulaganngwang   ka teng, se se akaretsa tshimologo ya motshameko, tswelelo ya one le gore o felela jang.

Go ya ka Rre Pule, badiragatsi ba tshwanetse ba tlhaloganya setlhogo sa motshameko  gore ba tle  ba ithulaganye sentle gore motshameko o nne le bokao.

Rre Pule o tladitse ka gore balebeledi ba metshameko ya BPTG, ba tshwanetse go nyalana le molaetsa o badiragatsi ba o romelang ka gore go dira jalo go ka thusa balebeledi gore ba ka baakanya diemo tse ba mo go tsone jaaka ba bonye batshameki ba dira, o tsweletse ka gore diemo tseo di ka akaretsa kgokgontsho, mogare wa HIV le tiriso ya madi e e lebaneng.  

Banana ba Boteti Peer Theatre Group ba ne ba nna le sebaka sa go rutana ka merafe e e mo kgaolong-potlana ya Boteti, mengwe ya merafe eo e le ya Bakhurutshi, Basarwa le Baherero.

Go rutana ka merafe e ne e le nngwe ya ditsela tsa go itse gore ba ka tla ba dira metshameko ya bone jang. BOKHUTLO