14 Dec 2016

Mookamela kgaolo ya bokoni jwa legare (north central) mo sepodising, Senior Assistant Commissioner Christopher Mbulawa a re ba tshwaragane le namane e tona ya go lwantsha ditagi mo kgaolong ya legare.

Rre Mbulawa a re go lebega fa Palapye e le boremelelo jwa tsone.

A re go dirisiwa Palapye  go tsenya ditagi mo lefatsheng leno morago di phatlaladiwe le lefatshe leno ka bophara.

 A re seemo se ga se beye sentle kgaolo ya legare, ka  jalo a kopa ba-tsaya karolo botlhe go ema ka dinao go lwantsha seemo se.

O ne a bua kwa thutopuisanyong ya twantsho nnotagi kwa Serowe ka Labotlhano.

O  ne a supa fa dipetelelo di le dintsi mo kgaolong  ya  Serowe, a re di akaretsa go betelelwa ga bana ba dikgwedi tse tharo go ya kwa  bagolong ba dingwaga tse di masome  a a ferang bongwe le botlhano.

Mmaboipego kwa Sekgoma Memorial Hospital, Mme Khabenyana Kegatileng o supile fa ba setse ba amogetse batho ba le masome marataro le bongwe ba ba beteletsweng, a re mo palong eo ba fera bongwe ke borre.

 A re borre ba ne ba betelelwa ke borre ba bangwe. BOKHUTLO