12 Dec 2016

Moeteledipele wa Ndadi Law Firm, Rre Uyapo Ndadi, o boleletse banni ba toropo ya Jwaneng gore ke nako ya gore Batswana ba ipelele tse ba di kgonneng go lwantsha HIV/AIDS.
Rre Ndadi o buile jaana kwa segopotsong sa bolwetse joo kwa Jwaneng bosheng.
A re go na le go gopola fela, Batswana ba tshwanetse go ipela ka jaana lefatshe leno le kgonne go tokafatsa diemo dingwe ele maiteko a go lwantsha segajaja seo.

A re e re le ntswa go na le dingwe tse a leng sebete se molangwana ka tsone mo molaong wa botsogo, o akgola puso go bo e ne ya dumalana le mogopolo o o ntshitsweng wa gore batho ba seka ba tlhatlhobelwa mogare wa HIV pele ga ba ka hirwa.

A re go le pele tlhatlhobo ya botsogo ya khiro e ne e akaretsa le HIV mme bahiri bangwe ba dirise seemo sa batho sa mogare ele sekgoreletsi gore ba hirwe.

O tsweletse a tlhalosa gore pele bahiri bangwe ba ne ba koba babereki ba ba nang le mogare mo tirong, selo se a reng se ne sa lwantshiwa kwa makgotla tshekelong gore mongwe le mongwe a nne le tshiamelo ya go bereka go sa kgathalesege gore seemo sa gagwe sa mogare ke se fe.

Rre Ndadi a re  erile bosheng ga dumalanwa gore magolegwa a batswakwa a fiwe diritibatsi ka jaana go tlhoka go dira jalo e le tsuololo ya ditshwanelo tsa setho fela mme e baya le matshelo a magolegwa a Batswana mo diphatseng. A re go tlhoka go fa magolegwa ao diritibatsi go ne go ka dira gore Batswana ba ba tshelang jalo kwa kgolegelong ba tsenwe ke malwetse a a ipatileng ka mogare wa HIV.

Le fa go ntse jalo, Rre Ndadi a re go ipelela kgatelopele e ga go reye gore ntwa e fedile go ka bewa marumo fatshe. O kopile Batswana go nna le seabe ka bongwe ka bongwe go lwantsha kanamo ya mogare oo.

A re ba itlhatlhobele mogare ba bo ba rotloetse ba masika le ditsala gore ba ba amegileng ba tle ba tsene mo lenaneong la diritibatsi.

A re kgethololo ya batho ba ba tshelang ka mogare e sa ntse e le kgwetlho mo lefatshing leno mme ebile e tshabisa batho go amogela seemo sa bone. A re kgethololo e ke yone e dirang gore batho bangwe ba tshabe go tsaya kalafi ya diritibatsi sentle. O kopile ba ba mo lenaneong la diritibatsi go tsaya kalafi sentle ka jaana e le maitlamo a botshelo jotlhe. A re ba seka ba letlelela ditumelo tsa bone go kgoreletsa thulaganyo ya diritibatsi ka ditlamorago tsa teng di sa ame botsogo jwa bone fela mme di ama le itsholelo ya lefatshe. BOKHUTLO