22 Nov 2016

Kgolegelo ga se phelelo ya botshelo, ka e kgona go aga le go ruta motho ka maele a botshelo.

Mafoko a, a builwe ke monana Rre Kenyaditswe Bofentse wa Mahalapye mo potsolosong le bosheng.

Rre Bofentse, yo o dingwaga di masome a mararo le bone, a re o ithutile go le gontsi fa a ne a le kwa kgolegelong mme e bile o tsweledisa botshelo sentle morago ga go nna teng dingwaga di le tlhano.

O tlhalositse fa a ithutile go roka diaparo,go betla, go roka didirisiwa tsa mo ntlong jaaka ditilo. O ne a isiwa sekoleng kwa Madirelo ke lephata la dikgolegelo.

A re e rile fa a tswa kgolegelong, a simolola go dirisa kitso ya gagwe ya go betla le go roka, a dirisa didirisiwa tse a neng a na le tsone le tse a neng a di adima mo bathong.

Rre Bofentse a re o ne a lemoga fa batho ba na le kgatlhego mo go tse a di dirileng ka ba ne ba tla kwa go ene ba batla gore a ba direle ditilo le ditafole.

A re o ne a dirisa madinyana a a neng a a bona fa a ntse a betla jalo go tlhama kompone e e bidiwang Boitemogelo Tailor Investment.

O tlhalositse fa e ne ya re ka ngwaga wa 2015 a kopa madi a banana mme a atlega,a bo a fiwa madi a a kana ka dikete tse di lekgolo tsa dipula.

A re o dirisitse madi a, go reka didirisiwa tse a neng a di tlhoka go dira kgwebo ya gagwe ya go betla le go roka.

A re mo nakong ya gompieno kompone ya gagwe e tsweletse sentle  e bile o thapile banana ba le batlhano.

O tlhalositse gore e re ntswa kgwebo e tsweletse sentle, go na le dikgwetlho tse ba di itemogelang jaaka letlhoko la koloi go isa dithoto tse di dirilweng kwa bathong.

Rre Bofentse a re e re le ntswa a filwe madi a puso, madi a a sa lekana ka a felela fela mo go simolodiseng kgwebo mme go nne thata  go e tsweledisa mo dikgweding tsa ntlha a sena go fela.

A re o lemogile fa se e le sone se digang dikgwebo tsa banana ka bontsi, mme a eletsa go rutintshiwa ka tsa go boloka madi a kgwebo.

O gakolotse banana  ba ba tswang kwa kgolegelong gore ba seka ba ineela kana ba itlhoboga mo botshelong mme ba dirise dithuto tse ba di anywileng ko kgolegelong le mananeo a puso go tsweledisa matshelo a bone go itsa go boela mo ditirong tsa borukutlhi gape.

A re o itumelela ka fa puso e mo thusitseng go fetola botshelo jwa gagwe ka teng, a tlatsa ka gore botshelo jwa gagwe bo tokafetse fela thata, o kgona go ithekela dijo le diaparo.

O rotloeditse banana gore ba seka ba kgobiwa marapo ke dikgwetlho tse ba kopanang le tsone mo dikgwebong tsa bone mme ba kope thuso mo go ba ba tsweletseng sentle. BOPA