14 Nov 2016

Moeteledipele wa kokelo ya Sabata (SDA) kwa Kanye, Ngaka Nyambe Mungandi a re go neela ke selo se se molemo.

Ngaka Mungandi o buile jaana kwa Kanye ka Labotlhano fa mokgatlho wa Reaitsane o ne o abela bana ba ba santseng ba le mo botsetsing ba le lesome dimpho.

A re mpho eo ke thotloetso mo bananeng ba lefatshe le gore ba ithute mo botsading ba tle ba tsoge ba direla lefatshe, selo se a reng se ka  isa Batswana golo gongwe.

Fa a tswa la gagwe, mogolwane wa baoki, mme Keabitsa Ramantele o ne a tlhalosa fa dimpho tse di tsile ka nako e e siameng, a tlatsa ka gore mo dinakong tse dingwe ba kopana le dikgwetlho tsa gore bo mmabana bangwe ba tla ba iphotlhere ka nako ya pelegi.

A re seo e be e le boikarabelo jwa sepatela gore bana bao ba rekelwa diaparo. Mme Ramantele o bile a tlhalosa gore dimpho tse di lebega di le dinnye mme mo go bone e le ba sepatela di dikgolo.

Mme Ramantele a re go a lebosega go bona botsadi bo tshwere thipa ka fa bogaleng.  A re modimo o ba okeletse ba tle ba tswelele ba dire go le go golo.

Mokgatlho wa Reaitsane, o tlhamilwe ka 2011 ke bahumagadi ba magosi le magosana a makgotla ka go farologana mo Kanye.

Moemedi wa mokgatlho, mme Mavis Makaba a re maikaelelo a mokgatlho o fa o tlhangwa, e ne e le go ema kgosikgolo nokeng, go mo  tlamela le go mo nonotsha jaaka botsadi.

A re ba o tlhamile ka nako e Kgosikgolo Malope a neng a se kotama ka 2011.

A re ba gwetlhilwe thata ke ka go bo motsadi a tshwara thipa ka fa bogaleng, a tlatsa ka go re morago ga go kopana le ba botsogo ba ne ba lemoga fa go tlhokega gore ba abele bana. O tlhalositse gape gore ba dira go le gontsi mo motsengg, ba tlhotlhelediwa ke mowa wa lorato le tirisano.

Mme Makaba a re ba ikemiseditse go tswelela ka mowa wa bopelotlhomogi le lorato jaaka mokgatlho wa bone o ntse o gola. Bokhutlo