03 Nov 2016

 Mapodisi a Letlhakane a tlhotlhomisa leso la  mosadi yo o dingwaga tse di masome a mabedi le bobedi wa kgotla ya Letsibogo.

Mo potsolosong, mogolwane wa  mapodisi a Letlhakane, Rre Michael Maphephu, o tlhalositse fa go lebega mme yoo le mokapelo wa gagwe ba ne ba tlhoka kutlwano mme mmelaelwa  a itaya moswi ka hamole.  

A re  tiragalo eo e diragetse ka  Mosupologo maphakela.

Rre Maphephu a re tiragalo e e bonwe ke mosimane yo o dingwaga tse di lesome mme a begela bagolo ba ba neng ba begela mapodisi, mme ba ragosetsa mosadi kwa sepateleng kwa dingaka di fetileng tsa rurifatsa fa a tlhokafetse.

A re setopo sa gagwe se kwa setsidifatsing sa sepatela sa Letlhakane  se letetse go tlhatlhobiwa ke dingaka.

Rre Mphephu o tlhalositse fa mmelaelwa a ne  a fitlhelwa mo nageng a lekile go ikgapela botshelo ka kgole mme ya kgaoga a leka gape go itlhaba ka thipa mo le gone leso le neng la retela.

A re ba ne ba mo ragosetsa kwa sepateleng sa Letlhakane kwa a neng fetisetswa kwa go se segolwane sa Nyangabwe. BOKHUTLO