02 Nov 2016

Rre Ofentse Mouwane wa kgwebo ya moriri ya Homex Hair Salon mo toropong ya Lobatse, o ija dithata morago ga dingwga a ntse a boloka madi a dikatso tsa gagwe.

O tlhaloseditse lekalana la BOPA mo potsolotsong bosheng gore o ne a boloka madi a a ka tshwarang P1 500 ka kgwedi go tswa mo dikatsong tsa gagwe a sa ntse a berekela mo dikgwebong tse di farologanyeng tsa moriri go tloga ka 2012, mme ya re ka ngwaga wa 2014 a mo thusa go simolodisa kgwebo ya gagwe ya moriri.

Lekawana le le tlholegileng mo Lobatse dingwaga tse di masome a mararo le bobedi tse di fetileng, la re le dirisitse madi a a ka tshwarang P17 000 go tswa mo letloleng la gagwe, go reka didirisiwa tse di tlhokegang mo kgwebong ya gagwe.

A re o sale a nna le lorato lwa go dira moriri a sale mmotlana, mme a ya go dira dithuto tsa moriri kwa Madirelo Training Centre gore a anywe botsipa le maele a go tsamaisa kgwebo ya mofuta o.

O tlhalositse fa kgwebo ya gagwe e le mo seemong se se itumedisang fa a e tshwantshanya le tse e di fitlhelang ka e kgona go mo fa dipoelo tse di ka tshwarang P10 000 ka kgwedi.

O tsweletse a tlhalosa fa kgwebo ya gagwe e na le babereki ba le barataro.

Rre  Mouwane o tlhalositse fa a sena nako ya go kgwa setshwe, ka bareki ba tla ka mmetela.

A re o lemogile fa botho, lorato, bopelotelele le go rekegela ditshwanelo tsa bareki di oka bareki e bile di godisa kgwebo.

O tsweletse ka go tlhalosa fa a bereka le batho ba ba farologanyeng jaaka bana ba dikole, badirelapuso le ba bangwe.

A re o motlotlo go bo a kgona go baakanya le mmatoropo wa Lobatse magareng ga ba bangwe ba ba tshwereng serodumo mo lefatshing leno.

Rre  Mouwane a re o na le dikgwetlho, mme e e mo tshwenyang thata e le ya bonnye jwa lefelo, ka a tshaba go babalelwa ke madi a mantsi a phiriso ya lefelo le letona.

A re o tsile go leka ka bojotlhe go kopa dithuso tsa madi kwa go ba lephata la banana, ka a eletsa go atolosa kgwebo ya gagwe.

Rre  Mouwane o rotloetsa banana go boloka madi gore ba kgone go fitlhelela ditoro tsa bone segolo bogolo jang fa ba batla go bula dikgwebo tse di ka tswelelang sentle. BOKHUTLO