02 Nov 2016

Mogokaganyi wa ditiro tsa lenaneo la Ipelegeng wa khansele ya Legare, Mme Keitumetse Batshu, o kopile banni ba Mogorosi go nna tlhaga mo ditirong tsotlhe tse di dirwang ka lenaneo la Ipelegeng mo motseng wa bone.

Mme Batshu o dirile kopo eo bosheng fa a ne a buisa banni bao mo phuthegong ya kgotla kwa motseng oo bosheng.

A re go le gantsi ba tshwenyega ka go sa wediwa sentle ga ditiro tsa go nna jalo ka nako e e dumalanweng e bile gape e se tsa boleng jo bo solofetsweng.

Ke gone ka moo a kopileng banni ba Mogorosi go sa nna le boitseme mo ditirong tsa ipelegeng ka jaana go dira jalo e le tshenyetso setshaba ka go le turu go tsweledisa fa go emeng teng.

 Mme Batshu o tlhalositse fa mabaka a a bolelwang mabapi le go sa diragadiwa ga ditiro tse ka mo go solofetsweng ke ka ntata ya gore babereki bangwe ba ipelegeng ba na le go tlhoka boikarabelo ka tiro e ba e abetsweng.

A re mmereki mongwe le mongwe o tshwanelwa ke go nna le boikarabelo jo bo tseneletseng ka tiro ya gagwe gore maduo a a nametsang mo tirong a bonale. O bile a kgothatsa babereki ba ipelegeng go nna le dipuisano tse di tlhapileng le bangwe ka bone ga mmogo le ba ba eteletseng.

Mme Batshu o bile a tlhalosa ka botlalo fa lenaneo la ipelegeng le diretswe go tlodisa ba itsholelo ya bone e sa iketlang melatswana, a tlatsa ka gore lenaneo le ga se tiro ya sennela ruri.

A re gape tsamaiso ke gore banni ba thapiwe ka go fapaana kgwedi le kgwedi gore ba bangwe ba tle ba kgone go oba letsogo e seng gore motho a berekele ruri dikgwedi tsotlhe.

Go sa le foo Mme Batshu o ne a tlhalosa fa moeteledipele wa ditiro tse mo motseng e tshwanetse ya nna yo o nang le maikarabelo e bile a ka berekisanya sentle le morafe le botlhe ba ba lebaneng ka ditiro tsa go nna jalo.

O tsweletse a tlhalosa fa moeteledipele a tshwanelwa ke go netefatsa gore go thapiwa palo e e dumalanweng ya babereki e bile ditiro tse di dirwang di rulaganngwa ka mo go faphegileng le ka therisanyo le bogogi jwa motse.

Fa a tswa la gagwe mongwe wa banni, Balibi Mokgethisi o ne a leboga go menagane lenaneo la ipelegeng a re le thusa thata go dira ditiro tsa morafe.

 A re ditiro di tshwana le go phepafatsa motse ke tse ba di itumelelang ka di rotloetsa botsogo jo bo itekanetseng ka dinako tsotlhe.

Rre Mokgethisi le ene o ne a iteela kobo moroko go kgothatsa banna go tsaya ditiro tsa lenaneo le ka tlhwaafalo.

E ne ya re go le pele, Kgosi Kago Pherethego a amogela phuthego a supa matshwenyego mabapi le palo e e tsenang mo seatleng ya ba ba tsenang diphuthego tsa kgotla.

A re go nna maoto a tshupa ga go tsena diphuthego tsa morafe ke gone go bakang tiego ya ditlhabololo tsa motse ka jaana kgotla ke gone kwa dikgang tsa motse di tshwarelwang teng. BOKHUTLO