25 Oct 2016

Kgosi Justice Motlhalane wa Sese a re o tshwenngwa ke dikgang tsa nnotagi le diritibatsi tse di golelang pele mo motseng wa gagwe.

Kgosi Motlhalane o tlhalositse mo potsolosong gore kgotla ya gagwe e tsweletse ka go amogela dikgang tsa melato e e diragalang batho ba itshietse.

O kaile fa melato e mentsi jaaka go lwa, go tlhapatsa, go tshosetsa ba bangwe matshelo le go lwela bakapelo, e diragala thata fa batho ba setse ba itshietse nnotagi jalo a kopa morafe go ikgapha.

A re le ntswa puso e dira maiteko a go tlhabolola matshelo a Batswana, bangwe ba tsweletse ka go ikgatholosa mananeo, mme ba inaakantse le nnotagi gammogo le diritibatsi.

O boletse fa banana ba motse wa gagwe ba ganelela mo dipotong le dibara.

A re le  diphuthego tsa kgotla ga ba di tsene ka ba okiwa ke diletso tsa ko dibareng.

A re bangwe batsadi ba tsogela kwa marekisetsong a nnotagi ba itlhokomolosa  maikarabelo a bone mo malwapeng.

A re fa motsadi a le mo tirisong ya nnotagi ga a kgone go tshwenyega gore a bana ba jele kana ba ile sekolong, selo se se feletsang se ama maduo a bana.

A re bangwe fa ba sena go nwa bojalwa ba lwantsha ba bangwe ba felele ba bolaana.

Rre Motlhalane a re motokwane o dirisiwa thata mo motseng wa gagwe mme ba sa itse ko o tsewang teng.

Go sa le foo, Kgosi Motlhalane o kaile fa a tshwentswe gape ke boimana jwa baithuti. BOKHUTLO