16 Oct 2016

Barui ba meraka ya Molelowakono, Kopanele le Motsholosele gaufi le motse wa Kang ba lela sa ga ragele mabapi le tshenyo e e dirwang ke dibatana tse ba tlhalosang fa di bolaya leruo la bone.
Rre Alec Molale yo e leng morui wa dikgomo,dihutshane le dipitse wa moraka wa Molelowakono a re matlhalerwa, bonkwe le bophokoje ba ba jesetsa mo kgobedung.                                                                     
Fa a bua mo potsolotsong le BOPA, Rre Molale o tlhalositse fa matlhalerwa a tswa kgakala a bolaya leruo la gagwe.
A re monongwaga matlhalerwa a ganyaotse dikgomo tsa gagwe di le supa.
O kaile fa manotonyana a dikgomo tse a nang le tsone e le jone botshelo jwa gagwe ka jalo a re go tlhorontshiwa ke dibatana go ka mo tlogela a iphotlhere.
A re go rua dipitse ke kgwetlho mo go bone ka bonkwe ba bolaya dipetsana di santse di le dinyenyane.
A re kgaolo ya bone ka e le sekaka ba dirisa dipitse go disa leruo la bone ka jalo bonkwe ba busetsa ko morago maiteko a go tlhokomela leruo la bone.
O tlhalositse fa gape go na le magakabe a maphatswa a a tsenelelang dikonyana mo sakeng a di phunya matlho.
Rre Molale o kaile fa ba na le tirisano mmogo e e lolameng le ba ofisi ya diphologolo le makagabisa naga kwa Kang.
A re matshwenyego a bone ke go bo tsamaiso ya fa ba ikuela e le bonya mme a supa fa kwa pheletsong ba felela ba bone thuso.
Rre Ikaeng Kgaponyane yo ene e leng morui wa monana kwa morakeng wa Kopanelo a re toro ya gagwe ya go ipona e le morui wa popota e kgorelediwa ke matlhalerwa le bonkwe ba ba ganyaolang leruo la gagwe.
Rre Kgaponyane yo a thusitsweng ke ba lephata la go neela banana dithata,metshameko le tlhabololo ya ngwao go simolola kgwebo ya thuo ya dikgomo a re ba tlhorontshiwa ke bonkwe ba ba bolayang dinamane.
A re gape o setse a kile a ya go kuela dikgomo tsa gagwe tse di neng di bolailwe ke matlhalerwa kwa go ba ofisi ya diphologolo le makgabisa naga.
A re ntswa puso e otlolotse letsogo go thusa banana ka mananeo a tshwana le a go simolodisa dikgwebo tsa thuo ya leruo sebe sa phiri ke go bo dibatana di kgoreletsa maiteko a mantle a puso.
Fa a ntsha la gagwe, Rre Morgan Mogomotsi wa moraka wa Motsholosele a re le ene o setse a kile a welwa ke seru sa go ganyaolelwa leruo ke dibatana.
A re monongwaga matlhalerwa a bolaile dikgomo tsa gagwe di le pedi.
Rre Mogomotsi o iteetse legofi ba ofisi ya diphologolo le makgabisa naga go bo ba ntsha ga tshwene go potlakela dikgang tsa tshenyo e e dirwang ke dibatana. BOKHUTLO