16 Oct 2016

Banni ba Polokwe gaufi le Moshupa ba re ba tshwentswe ke batho ba ba tsweletseng ka go epa motlhaba gaufi le motse wa bone e se ka fa molaong.
Modulasetilo wa komiti ya ditlhabololo tsa motse, Mme Ratho Morupisi o boleletse BOPA mo potsolotsong bosheng gore ga ba robadiwe ke magodu a a utswang motlhaba ka dikgoka mo molapong wa Tlhokwane.
O boletse fa bogodu jo bo ne bo ntse bo ritibetse, mme jwa simolola go ya magoletsa gape ka Seetebosigo. O tlhalositse fa magodu ao, e le Batswana  e bile ba tswa mo mafelong a a gaufi a tshwana le Kanye, Moshupa le Moshana.
A re o utlwisiwa botlhoko ke gore ba utswa nako nngwe le nngwe ba se na poifo epe. Mme o tlhalositse fa a lekile go bua le bone makgetho a le mmalwa go se nko e e tswang lamina.
“Fa ke ba raya ke re ba lese go senya ba nthaya ba re ga ke na molapo,” a tlhalosa.
Modulasetilo o ne a supa fa mapodisi a le maoto a tshupa mo go ba tsweng thuso. “Fa ke ile go ba begela kgang e, ba nna ba mpolelela gore bone ga ba na koloi,” a tlatsa ka go re le fa ba e bone, ba nna ba retelelwa ke go boela kwa go ene go tla go latedisa kgang.
A re go leka go fema seemo se, o eletsa ba ka nna le komiti ya twantsho borukutlhi go oketsa baithaopi ba ba leng teng. Gape o kopile tshwaragano magareng ga beng ba motse, mapodisi le setshaba ka kakaretso go lwantsha seemo seo.
Mongwe wa banni Rre Kebeilwe Tsietso o ne a gatelela mafoko ao ka go re magodu ao a senya a sa tshabe bosigo le motshegare.
Fa a akgela, mookamela mapodisi a Moshupa yo mosha yo e bileng a ne a ile go iponela seemo ka matlho, Supt Oteng Nganda a re ntswa ba kgona go nna le tlhaelo ya dikoloi, go botlhokwa go latedisa dikgang tsa go tshwana le tse. A re o lemogile fa gantsi mapodisi a sa tsee dikgang tsa motlhaba tsia.
Mme Rre Nganda o ikanne gore ba tlaa simolola go tsibogela dikgang tse ka maatlametlo. “Re tlaa tswa ka maano a a ka thusang go hema seemo se.” O boletse fa mangwe a maano a e le go bitsa diphuthego tse mo go tsone mapodisi le morafe ba tlaa tswang ka megopolo ya go fokotsa borukutlhi jo le go tshwara dilalome. BOKHUTLO