10 Oct 2016

Mookamela mapodisi a Good Hope,  Superintendent Mogomotsi Kwapa  a re ba tlhotlhomisa  tiragalo e mo go yone rre mongwe wa dingwaga tse di masome a mabedi le bofera bongwe a tlhokafetseng morago ga gore a tlhoke kutlwisisano le monnawe wa dingwaga tse di masome a mabedi le borataro.

Superintendent  Kwapa a  re tiragalo e, e diragetse bosheng kwa kgotleng  ya Mathiba. A re rre yo motona o ne a kgalemela monnawe a utlwa a tsositse modumo mo lwapeng,  mme monnawe a mo itaya ka lebole, a wa a bo a idibala. O ne a ragogesediwa kwa kokelwaneng ya Mmathethe, kwa a neng a fetisediwa kwa kokekolong potlana  ya Good Hope.

Superintandant Kwapa a  re le kwa  Good Hope ba ne ba leka go mo fitisetsa kwa Marina mme ka maswabi ba felela fa sepateleng sa Athlone kwa ba bongaka ba neng ba rurifaditsa gore o tlhokafetse.

Superintendent Kwapa  a re modiradilo o setse a itshupile fa pele ga lekgotla la ga mmakaseterata mme o santse a tshegeditswe ke mapodisi.

E re dikgang di eme jalo, Superintendent Kwapa  a re ba begetswe tiragalo e nngwe e mo go yone, rre mongwe a fitlhetsweng a akgega mo setlhareng morago ga go  begwa ke mofiti ka tsela  morago ga letsatsi la boipuso.

A re moswi o  ne a le dingwaga tse di masome  a mabedi le borataro a tlholega kwa kgotleng  ya Tebogo gone kwa Mmathethe.

A re rre yoo go bolelwa a tsamaile maitseboa  a letsatsi la boipuso , morago ga gore  a omane le rraagwe a leka go mo kgalemela a bona a sa itshware sentle. BOKHUTLO