22 Sep 2016

Kgosi Matshidiso Babeile wa motse wa Kisa mo kgaolong ya Kgalagadi  a re go botlhokwa go leboga batsadi le go ba tlhokomela ka ba dirile tiro e ntle  mo kgodisong ya bana ba bone mo dinakong tsa bogologolo  botshelo bo santse bo le bokete.

Kgosi o buile se  Labone mo kgotleng kgolo ya motse oo jaaka a ne a diretse bagolo ba motse wa gagwe dijo tsa motshegare e le tsela nngwe ya go ba fa tlotlo  le go ba lebogela seabe sa bone mo ditlhabololong tsa motse oo.

Fa a tlhalosa maikaelelo magolo a  letsatsi leo, Kgosi Babeile o boletse fa e ne e le go lemoga  bagolo ba motse oo, ditlhabololo tsa motse oo tse ba di dirileng tse  di bonwang  ka matlho gompieno  ka mowa wa bopelotelele, boithapo le boipelego mo go tlhomamiseng gore motse oo o fetoga go nna se o leng sone gompieno.    

O ne a galaletsa bogogi jwa motse wa Kisa jwa pele  ba akaretsa, ba bogosi, makhanselara, ba komiti ya ditlhabolo, barutabana le bagolo ba motse oo ba bangwe ba bone ba sa tlholeng ba le mo botshelong bogolo jang ka ba simololetse  ditlhabololo tsa motse oo fela mo legoeleleng.

Kgosi  Babeile o kaile fa godimo ga botlhe a rolela hutshe bomme ka  e le bone “ba ba tshwarang thipa ka fa bogaleng” e bile e le thari ya setshaba ka e le bone konokono mo kgodisong  le tlhokomelo ya bana.

O kaile fa batsadi ba bogologolo ba ne ba lemoga fa thuto e le botlhokwa e bile e le boswa jwa sennela ruri ka jalo ba simolodisa sekole se sebotlana kwa motseng oo ka 1965 ka baithaopi ba barutabana pele ga puso e tsaya sekole seo ka 1973.

Dibui ka go farologana  di ne tsa iteela Kgosi Babeile legofi ka tiro e ntle ya go gopola batlapele ba motse ka go tsaya boikarabelo le ponelopele gore motse wa bone gore o  tlhabologe.

Mokhanselara wa pele wa motse, Rre Reemeleng Matswiri o ne a galaletsa Kgosi Babeile a supa fa se kgosi a se dirileng e le sone sesupo sa gore o rata  le go  tlotla batho  botlhe mo motseng wa gagwe.

Rre Matswiri o ne a iteela kobo moroko mafoko a ga kgosi a gakolola thata banana gore ba seka ba ikgatholosa batsadi mme ba tseye boikarabelo mo matshelong a batsadi ba bone ka tlhokomelo le tlotlo tse di kwa godimo.

Fa a bua mafoko a tebogo, Rre William Dipheko yo le ene e kileng ya nna mokhanselara wa motse oo, o lebogile balemi-barui  ba bangwe ba bone ba  seong mo botshelong,  baagi, baruti ba pele ba motse oo ka tiro e ntle e ba e dirileng gore motse o gole o bo o tlhabologe. Bokhutlo