21 Sep 2016

Mothusa tona wa  lephata la peeletso, papadi le madirelo  gape  e le mopalamente  wa kgaolo  ya  Lobatse, Advocate Sadique Kebonang o kgothaditse baithuti ba sekole se segolwane sa Pitikwe go ikanya dibuka gore ba atlege mo botshelong.

Advocate Kebonang o dirile kgothatso eo, ka Lwetse a le 16, jaaka go ne go tshwerwe letsatsi la kabo dimpho go lemoga ba ba dirileng ka bokgabane  mo dithutong tsa bone go akaretsa baithuti le barutabana ba ba dirang  tiro ya bone ka natla,le go bula semmuso  sefikantswe sa  BOT50 (BOT50 Monument), se se dirilweng go supa gore sekole seo le sone se ipelela boipuso.

Mothusa tona o gwetlhile baithuti go akanya dilo tse ditona  mo botshelong, mo dithutong, ka ditalente tsa bone, ba nne boikanyego le gone go reetsa dikgakololo tsa batsadi a re fa ba ka dira tsotlhe tse di botlhokwa ba ka fitlhelela ditoro tsa bone.

E rile a ema mogolwane wa lephata la thuto mo kgaolong ya Borwa Rre Agro News Maseko a bolelela barutabana le baithuti gore bontle bo a itirelwa, a tlatsa ka gore mogokgo le mothusa-mogokgo ba sekole seo o dira tiro ya bone ka natla,  barutabana  le komiti ya batsadi le barutabana mme sekole se ntshe maduo a mantle a a boletseng fa lephata le a lebogela.

Rre   Maseko  o gakolotse  baithuti go tlhwaafalela dithuto tsa bone, go nna ditsala le dibuka gore ba ntshe maduo a mantle a a reng a dira gore motho a nne se a batlang go nna sone mo isagong, a re mme se ba ka se kgona fela fa ba ka supa bokgoni le go tlhwaafalela dithuto tsa bone.

O tsweletse a supa gore dingwaga tse tharo tse di fetileng tse di tlhomagane maduo a sekole sa Pitikwe a golela pele, a tlatsa ka gore se ka ikanngwa ka jaana se ne se tsere maemo a lesome le borataro lefatshe ka bophara.

Rre Maseko a re sekole se se ntsha dipalo tsa bana ba bantsi  ba ba dirileng sentle go ya kwa dikoleng tse dikgolwane, a tlatsa ka gore kabo dimpho e kgothatsa gore ba dire go feta go nna baithuti ba tlhwatlhwa ba ba nang  le boleng.

Mo go tse dingwe, Rre Maseko o boletse gore, go  okediwe, gape go bo go tokafadiwe maduo ka gore banaleseabe botlhe ba nne ba etela  sekole jaaka baruti,le setshaba ka kakaretso go thusa baithuti, go tshwaragana lefatshe lotlhe jaaka go ipelelwa dingwaga tse di masome a matlhano a boipuso.

Mothusa mogokgo wa  sekole seo Mme Gaolapelwe Malepa o supile gore maikaelelo magolo ke go ipela  le lefatshe jaaka go ipelelwa dingwaga tse di masome a matlhano a boipuso, go itumelela go dira ka natla le go tswelela go dira jalo go ya kwa pele.

Mme Malepa   a  re faesale sekole se se nna teng ka ngwaga wa 1996 ba dirile ka thata go ntsha baithuti ba tlhwatlhwa.

A re  ba thusitswe ke kompone ya  Vertico Productions go rekela bana  ba ba dirileng go gaisa dimpho  go ba rotloetsa go tswelela ba dira  ka natla, le go kgothatsa ba ba sa tseyeng sepe go tsenya marapo mo dinameng mo tirong ya sekole ka e le bokamoso jwa bone.

Baithuti  ba ba gaisitseng ba ne ba rotloediwa ka go fiwa  dietsele ditlankana le sekete sa dipula, mophato mongwe le mongwe go simolola ka mophato wa ntlha go fitlha ka wa boraro.

Mme  barutabana le badiri le bone ba ba  gaisitseng ba ne ba ikgapetse, seetsele le sekete sa dipula le setlankana.

E rile a leboga  mogolwane mo lephateng  la thuto  Rre  Tshiamo  Rakgabo, a  leboga ba kompone  ya  Vertico Productions  ka tiro e ntle ya go rotloetsa   baithuti, a tlatsa  ka go gakolola baithuti gore katlego ga se tiro ya nakwana, ke tiro e e batlang gore barutabana le baithuti ba tshegetse maemo a ba batlang go nna mo go one kana ba dire go feta foo,a tlatsa ka gore baithuti ba ipele mme ba ntse ba ipaakanyetsa ditlhatlhobo tsa bone.

Kabo dimpho e e ne e tshwerwe ka setlhogo se se reng  go tsaya karolo ga banaleseabe go rotloetsa  bokamoso selotlolo sa katlego ya dithuto. Bokhutlo