18 Sep 2016

Banni ba Radisele kwa kgaolong ya Legare ba lela sa mmaiyoo ntateng ya tlhaelo ya metsi.
Mothusa modulasetilo wa komiti ya ditlhabololo tsa motse, Mme Phetso Kebonang, o boletse mo potsolotsong gore le ntswa ba sielwa metsi ka dikoloi, metsi ao ga a ba lekane ka jaana dikoloi tse di ba nosang di siela gape Mogome le Mokgware ga mmogo le dikole tse nne.
Mme Kebonang a  re fa e sale ka Sontaga wa beke e e fetileng, ba tshelela mo selelong sa khuranyo ya meno ka jaana ba na le malatsi ba sena metsi mo e bileng baithuti ba sekole se sebotlana ba neng ba busediwa kwa malwapeng ntateng ya letlhoko la metsi.
Mogokgo wa sekole se sebotlana sa Radisele, Mme Mosadinyana Phukula, a re le ntswa Water Utilities e siela sekole sa gagwe metsi ka dikoloi, seo ga se rarabolole mathata ka jaana sekole sa gagwe se na le baithuti ba le makgolo a supa masome a matlhano le borobabongwe le barutabana ba le masome a mabedi le botlhano.
A re fa badiri ba Water Utilities ba ka amogela mogopolo wa go tshelela barutabana metsi mo ditankeng tsa dijojo tse di mo malwapeng a bone le go tshela a mangwe mo jojong ya sekole go dirisiwa ke baithuti, seo se ne se ka rarabolola kgang ya tlhaelo ya metsi mo sekoleng seo.
Maiteko a babegadikgang a go buisana le mogolwane wa ofisi ya kanamiso mafoko a koporase ya Water Utilities kwa Gaborone a ne a retela ka jaana mogala wa ofisi ya gagwe o ne o lela fela, mme o sa arabiwe. BOKHUTLO