15 Sep 2016

Banana ba setlhopha sa mmino wa setso se se tumileng thata kwa Mahalapye, Phate Ya Setso ba re ba tlaa tshegetsa moletlo wa ipelelo ngwao kgwedi e e tlaang ya Phalane e le 29.

Moanamisa mafoko wa setlhopha seo yo gape e leng leloko, Mme Charity Keobokile a re  ba tswa kgakala ba na le mogopolo wa go tshegetsa moletlo wa go nna jaana mme ba retelelwa ka ntlha ya letlhoko la madi.

A re e le banana ba ba itsetsepetseng mo go somareleng ngwao ba bone go le botlhokwa gore ba dire moletlo o, o e seng fela  go ikokoanyetsa madi ba le setlhopha mme e le go godisa serodumo sa ngwao ya banni ba Mahalapye.

Mme Keobokile o tlhalositse fa ba na le keletso e kgolo ya go aga legae la ngwao (cultural village), a re go thona gore motse wa Mahalapye o bo o sa tuma thata ka tsa ngwao segolo jang ka go na le merafe e e farologaneng mo motseng e e itsegeng ka go tlotla ngwao e akaretsa Baherero, Bakalaka, BaXhosa le e mengwe

Moletlo o o tlaa tshwarwang ngwaga le ngwaga, o tlaa bo o tshwerwe ka fa tlase ga setlhogo se se reng; Ngwao ya rona, seipone sa rona; mothubane o matshego mararo. Moletlo o o tlaa fa morafe sebaka sa go ka supa dingwao tsa bone tse di farologaneng gore ba tle ba ikgakologelwe se ba leng sone.

O tsweletse a tlhalosa fa moletlo o, o o tlaa bong o tshwaretswe kwa Letlapa le Ikadile  gone mo Mahalapye, o tlaa bo o akaretsa dijo, mmino ga mmogo le metshameko ya Setswana.

A re le mo maitseboeng go tlaa nna le maitiso a go tlaa bong go tlhajwa mainane, dithamalakane le ngangisano ya dikgang tsa ngwao magareng ga banana le bagolo gare ga tse dingwe.

O buile gape fa go tlaa bo go le metshameko ya Setswana, go tla go ruta basha le go ba lemotsha fa e ka ba natefelela fela jaaka bogologolo, kgotsa go gaisa e ba e tlotlileng ya sesha.

A re go tlaa bo gape go na le ba ba supang kapari ya setso ka go farologana ga yone.

Mme Keobokile a re ba setse ba lekodisitse bogogi jwa motse ka kgang e mme ba sa ntse ba tlaa tsamaya le motse go itsise banni.

O ikuetse mo morafeng go ba amogela le go ba rotloetsa ka sepe fela se ba nang le sone gore maiteko a bone a tle a atlege.

A re o dumela thata fa banni mmogo le bagwebi ba motse  o ba ka eletsa le bone gore motse o itsege ka tse dintle jalo ba kopa thotloetso gore ba kgone go fitlhelela seo. BOKHUTLO