14 Sep 2016

Molaodi wa Bobirwa, Rre Mooketsi Lesetedi,  a re o itumelela tirisano mmogo ya banni ba Molalatau mo go ipaakanyetseng meletlo ya boipuso.

Rre Lesetedi o buile se kwa kgotleng ya Molalatau bosheng kwa mogwantong wa go ipaakanyetsa boipuso.

Mogwanto o, o ne o rulagantswe ke komiti ya BOT50 ya Molalatau go kokoanya madi a letsatsi la boipuso.

Komiti e, e kgonne go kokoanya dikete tse tharo, makgolo a supa le masome a marataro a dipulamo letsatsing leo go oketsa a a setseng a le mo letloleng a  dikete tse di lesome le boraro.

Rre Lesetedi a re o itumedisiwa gape ke gore banni ba  tshwara merapelo kwa kgotleng Labone mongwe le mongwe ka nako ya bosupa mo mosong,  mme a re ba tswelele fela jalo ka ebile kgwedi ya Lwetse e le ya merapelo.

Mme Mpule Malema-Ditirwa go tswa ko lekaleng la Motor Vehicle and Accident Fund (MVA) le ene a supile fa a lebogela tshwaragano le maitseo a mantle a banni ba motse wa Molalatau mo go ipaakanyetseng letsatsi le.

MVA e ne ya abela komiti eo dikete tse pedi le makgolo a matlhano.

Banni e ba supile fa ba tlaa tswelela ka tshwaragano go ya go ileng. BOKHUTLO