11 Sep 2016

Dikereke  tsa Letlhakane kwa kgaolong-potlana ya Boteti di kopilwe go tshwaraganela go lwantsha HIV/AIDS ga mmogo le go rapelela Botswana.

Kopo e, e dirilwe ke Moruti Lesedi  Galebotsane wa kereke ya St Phillips kwa tsimolodisong ya merapelo kgatlhanong le HIV/AIDS kwa Letlhakane bosheng.

Mme Galebotswe a re dikereke di tshwanetse  go nna sekao ka boitshwaro jo bo lolameng  gore ba ba sa tseneng ba kgone go bona bokao jwa kereke. 

A re fa mogare le bolwetse bo simologa go ne go sena se se thusang mme batho ba le bantsi ba ne ba  latlhegelwa ke matshelo  mme morago   puso e ne ya simolodisa lenaneo  la dipilisi tse di ritibatsang mogare wa HIV/AIDS. Mme Galebotsane a re gompieno seemo sa HIV/AIDS se botoka ka gore puso e ne ya ntsha lentswe gore go kopanelwe seemo se, ga  rutiwa batho ka jone le gore ba amogele  ba ba amegileng.

A re ba tshwanetse go rapela gore Modimo a ba sireletse mo malwetsing le dikotsi tsa tsela a re ba ka kgona fela ka tshwaragano ya dikereke. Kgosi Baruntshi Kegapetswe ene o ne a kopa dikereke gore di tlhame mekgatlho a re ke yone e ka di bopaganyang.

 Kgosi Kegapetswe  o ne a  kopa baruti  gore ba  rotloetse diphuthego tsa bone go tsaya  karolo mo ditiragalong le dipaakanyo tsotlhe tsa go ipelela boipuso. A re ba tsenye letsogo, ba thuse gore boipuso jotlhe bo atlege.

E rile fa a tlhalosa maikaelelo a merapelo eo, mogokaganyi wa merero  ya HIV/AIDS, Rre Ketlaleka  Monyadiwa a re ke go gopola ba ba re tlogetseng le go lebelela kwa morago kwa re tswang teng dingwaga tse di masome a matlhano go tshelwa le HIV/AIDS.

Rre Monyadiwa a re  ngwaga  ono gape e itebagantse le go rapelela boipuso e le bontlhabongwe ja go ipela, go tlotlomatsa mebala ya lefatshe leno ga mmogo le go rotloetsa mowa wa popagano.

E rile fa a leboga modulasetilo wa lekgotla la baruti, Moruti  Dube Kadibadiba a leboga gore dikereke di ne di tsile ka bontsi mme a ba rotloetsa go dira jalo ka bokopano jwa dikereke jo bo tlaa tshwarwang kgwedi ya Lwetse e le masome a mabedi le botlhano,  e ntse e le meletlo ya go ipelela boipuso.

Rre Kadibadiba  a re  dikereke ga di tsene diphuthego tsa kgotla, a re tshwaragano ya dikereke ke yone fela e ka dirang gore ba fenye dikgwetlho. BOKHUTLO