05 Sep 2016

 Mothusa mokwaledi mo ofising ya ga tautona le bodirelapuso a itebagantse le dikitsiso le kgaso , Rre Mogomotsi Kaboeamodimo o akgoletse  lebenkele la Choppies go bo  le tsweletse ka go tsibogela mokgosi wa ga Tautona wa lenaneo la go agela Batswana ba ba tlhokileng lesego matlo.

Rre Kaboeamodimo o ntshitse kakgolo eo kwa moletlong wa go  rola matlo a supa  a a agilweng ke ba lebentlele  la Choppies ka lenaneo la ga Tautona la go agela batlhoki kwa motseng wa Rakops ka Labone.

Rre Kaboeabodimo a re Batswana ba lesego ka ba na le Tautona yo o kgathalang ka matshelo a batho, a re motho mongwe le mongwe o tshwanetse go nna le bonno jo bo lolameng.

Rre Kaboeamodimo a re go agela batlhoki matlo go  tsisa phetogo e tona mo matshelong  a bone, ka jaana bonno bo o fa motho seriti. O tsweletse a re go  sego letsogo le le abang, e bile seriti sa motho tlhogo ya kgomo. 

A re ke ka moo Tautona a neng a simolodisa lenaneo le ka  ngwaga wa 2010, a tlhaba mokgosi  ko dikomponeng, makalana a a ikemetseng, ga mmogo le setshaba ka kakaretso gore ba tsenye  letsogo.

Rre Kaboeamodimo a re go setse  go rotswe matlo a lenaneo  le a le makgolo a marataro le masome a mararo le borobabongwe fa a le  masome a mararo le bobedi a sa ntse a agiwa, a robabongwe one a fedile.

A re maikaelelo a lenaneo gape ke go diragatsa lengwe la matshego a tebelopele ya lefatshe leno le le reng tshaba e e kutlwelobotlhoko e bile e kgathala ka ba bangwe.

Rre Kaboeamodimo o ne gape a re o leboga botlhe ba ba nnileng le seabe mo  lenaneong le, ba ba  akaretsang  makalana ka go farologana, dikereke le ba bangwe.

Mogokaganyi  wa ofisi ya  banalebogole Rre Thomas Motingwa  o ne a leboga Tautona  ka a ne a lemoga gore banalebogole ba bewa kwa mahuri  mme a simolodisa ofisi ya banalebogole ka 2010 ka fa tlase ga ofisi ya gagwe.

Rre Motingwa o ne gape a leboga lebentlele la Choppies le a reng le ne la ba tswa thuso go fitlhela la gompieno ba dira jalo ka go hira  banalebogole  mo lebentleleng la bone, a tlhalosa gore ba setse ba hirile ba le makgolo a mabedi, ba bangwe ba bone ba setse ba bone mafulo a matalana mme go setse ba le lekgolo le masome a mararo. 

Rre Motingwa  a re lebentlele la Choppies le tsweletse pele ka seabe sa bone mo go thuseng banalebogole  ka jaana  mo matlong a supa a a abiwang gompieno a le mane ke a banalebogole.

E rile a lebogela matlo ao, mongwe  wa ba ba abetsweng matlo, Rre Kapenavarwe Kaventengure   a leboga Tautona, lebenkele la Choppies le banaleseabe ka kakaretso go bo ba  bone go tshwanela gore le bone ba nne le bonno jo bo siameng.

Rre Kaventengure  o ne gape a rotloetsa ba ba agetsweng matlo jaaka ene ga mmogo le batlhokomedi ba bone go tlhokomela matlo ao gore a nnele ruri  mo seemong  se se siameng.

Mogolwane wa lebentlele la Choppies, Rre Ramachndran Ottapathu a re ba setse ba agetse batlhoki matlho a le masome a matlhano le botlhano. 

Rre Ottapathu a re maikaelelo a bone ke go tswelela  ba thusa  ka go hira Batswana le go agela  ba ba tlhokileng lesego matlo. 

E rile fa a amogela batho, Kgosi Gonkgang Mankgatau wa Rakops a re  Tautona  o segile tema ka  lenaneo le la gagwe la go agela ba ba tlhokileng lesego matlo, a bo a ntsha  banalebogole ko mahuri ka a ne a lemoga gore ba tlhoka thuso. 

 Kgosi  Mankgatau a re le bone e le magosi mo kgaolong ba dumelane gore magosi a motse mongwe le mongwe ba agele monalebogole wa motse wa bone  ntlo. BOKHUTLO