26 May 2013

Batho ba Zutshwa kwa kgaolong ya Kgalagadi bokone ba ngongorega ka dibatana tse di ba tlhorontshang bosigo le motshegare. 

Ba ne ba bua mo phuthegong ya kgotla e biditswe ke mopalamente wa kgaolo ya bone Rre Phillip Khwae bosheng. 

Rre Mothelizi Moleta o tlhalositse fa morafe o tshelela mo letshogong ntateng ya ditau le diphiri tse di gobeyang mo motseng le meraka ya bone. 

O tlhalositse fa diphiri di tsenelela leruo la bone mo masakeng fa ditau tsone di bolaya leruo kwa mahudisong. 

A re gantsi dibatana di tlhasela diruiwa tsa bone di tswa ntlheng ya lefelo la diphologolo la transfronteir, mme ka jalo a ikuela mo pusong go aga terata e e tlaa kgaoganyang mahudiso le molelwane wa lefelo la diphologolo.

Rre Moleta o ne gape a ikuela mo pusong go akaretsa diphiri mo  diphologolong tse barui ba phimolwang dikeledi fa di ba bolaetse leruo.

A re tshenyo e e dirwang ke dibatana e busetsa morago maiteko a puso a go namola Batswana  lehuma.

O supile lephata leo ka monwana a re badiri ba lone ba maoto a tshupa go tsiboga fa morafe o ikuela fa leruo le bolailwe ke dibatana.

E rile fa a tsibogela matshwenyego a batho, mopalamente Rre Khwae a tlhalosa fa puso e  tshwentswe ke dikgotlhang tsa batho le diphologolo tsa naga.

 A re ga go jese di welang gore dibatana di bo  di bolaya leruo ka jaana e le lone pinagare ya botshelo. ja batho ba Kgalagadi.         

O ne a solofetsa morafe gore o tlaa ikopanya le tona wa diphologolo le makgabisa naga go tswa ka metlhala ya go rarabolola dingongora tsa morafe.

Mopalamente o ne gape a tlhalosa fa puso e sekaseka go oketsa madi a phimolo dikeledi a a fiwang morui fa leruo la gagwe le bolailwe ke ditau. BOKHUTLO