03 Aug 2016

Mookamela mapodisi a Maun, Superintendent Peter Gochela o boletse fa a tshwenyega ka boitsholo jo bo sa letlelesegeng ja bakgweetsi bangwe ba ba felelang ba baka dikotsi fa go sa tlhokafaleng.

Superintendent Gochela a re ba setse ba tlhomamisitse gore selekanyo sa masome a ferabongwe le botlhano mo lekgolong sa dikotsi tsa tsela di bakwa ke diphoso tsa bakgweetsi.

O boletse jalo mo potsolotsong gore bontsi ja bakgweetsi ba felela ba latlhegelwa ke taolo ya dikoloi tsa bone ka jalo ba baka dikotsi tse di ka bong di ne tsa seka tsa diragala. 

A re selekanyao sa masome a ferabongwe le boferabongwe sa dikotsi di diragala mo toropong a tlatsa ka gore seemo sa go nna jalo se a tshwenya. Senior Superintendent Gochela o ne a re o akanya gore go ka tshwarwa bakgweetsi ba ka nna 50-70 ka letsatsi. 

 O boletse fa mosuke wa dikoloi mo toropong o ka tswa o na le seabe mo dikotsing a tlatsa ka gore Maun ga a na ditsela tse di siameng ntswa palo ya dikoloi yone e oketsegile.

Le fa go ntse jalo, se se tla jaana morago ga gore go nne le kotsi kwa kgotleng ya Sedie, fa koloi ya modiro wa Toyota Corolla e thulana le ya Toyota Mac mo tselelng ya Sir Seretse Khama mme ga tlhokafala motho a le mongwe.

 Mookamela mapodisi o boletse gore Toyota Corolla e ne e ya kwa toropong fa Toyota Mack e ne e fapaana nayo. A re Toyota Mac e e neng e fapaanya, e ne ya thula koloi e nngwe gape ka fa thoko mme ya tswela kwa ntle ga tsela.

Kotsi eo e diragetse ka nako ya 1210 bosigogare mme mokgweetsi wa Toyota Corolla, yo o neng a le nosi mo koloing o ne a bona dikgobalo tse di masisi mme a ragosediwa kwa kokelong ya Letsholathebe Memorial kwa a neng a feta a tlhokafalela teng.

Senior Superintendent Gochela a re moswi, yo o dingwaga di 33 e ne e le mokgweetsi wa taxi mme a tlholega mo Maun. Go fokotsa go tlhoka boitsholo ja bakgweetsi, mapodisi a tlhomile dikganedi tsa tsela. Ditlhopha tsa mapodisi di le pedi di aname le motse, fa e nngwe e le kwa tselelng e tona ka kwa ntle ga motse.BOTKHUTLO