31 Jul 2016

Kgosi Pule Bareki wa Batlharo go tswa Afrika Borwa a re bogosi bo tshwanelwa ke go tlotlwa ka dinako tsotlhe.

Kgosi Bareki o buile se ka Labotlhano ka peo semmuso ya ga Kgosi Phllip Lorekang wa  Maubelo kwa kgaolong ya Kgalagadi.

Kgsi Bareki o ne a gakolola Kgosi Lorekang go  dira sentle le morafe wa gagwe ka go  nna pelotelele, tirisano mmogo, tshwaragano , erato le gone go tshwara morafe wa gagwe ka tekatekano.

A re kgosi e tshwanetse go  rerisana le morafe wa gagwe ka tse di amang matshelo a bone, botlhoki jwa bone  ka seo e le sone se se  ka mo kgontshang gore tiro ya gagwe e tsamae ka thelelo.

Kgosi Bareki o ne  a gatelela thata gore  Kgosi Lorekang a  itsetsepele ka lefoko la Modimo,  go o  ikanya, le go o  tshepa ka dinako tsotlhe a kaya fa e le one tsela le boammaaruri   mo go mo  kaeleng  tsela  le go mo sireletsa gore a tle a kgone go etelela pele morafe wa gagwe le go dira tiro ya gagwe ka matsetseleko.

A re “kgosi thotobolo e olela  matlakala” ka jalo Kgosi Lorekang o tshwanelwa ke go nna a ipaakanyeditse go reetsa dikgang tsa dilelo le dingongorego tsa morafe wa gagwe le go tswa ka  tharabololo  ya tsone e le moeteledipele yo o tshephafalang.

Mothusa tona wa dikgaolo le tlhabololo magae Rre France Van Der Westruihezen fa a ntsha la gagwe o ne a supa fa lefatshe leno le tseela thata bogosi kwa godimo  ka e le tsone dipilara mo tsamaisong le ditlhabololo  mo  lefatsheng leno.

O ne a galaletsa thata Kgosi Setlhare Lorekang ka tiro e ntle e a e dirileng ya go neela morwaawe setilo a sa ntse a le mo botshelong, a kaya fa dikgang tsa go lwela bogosi di atile  thata mo lefatsheng leno fa go sena neelano e a e dirileng.  

Rre Van Der  Westruhuizen yo e bileng gape e le mopalamente wa kgaolo ya Kgalagadi Borwa o boletse fa bogosi le sepolotiki di sa tsamaelane ka di ka felela di tlisa pharologanyo le dikgaogano mo merafeng.

O ne a gakolola thata mohumagadi wa ga  Kgosi Lorekang go nna gaufi le ene ka go  mo  ema nokeng le go mo fa dikgakololo tse di maleba ka dinako tsotlhe ka seo se ka thusa thata mo go mo tlhofofaletseng tiro.

 Fa a neela morwaawe setilo sa bogosi semmuso,  Kgosi Setlhare Lorekang  wa Maubelo  o ne a tlhalosa fa a ne a rerisana le morafe wa gagwe fa a tlogela tiro ka bogodi  le bokoa morago ga go o etelela pele dingwaga tse di masome a mararo.

Kgosi Lorekang  o ne a gakolola thata morwawe  go tlhoka go ikgogomosa mme a sale motlhala wa gagwe morago  ka go dirisana sentle le morafe ka tlotlo e e kwa godimo go tlhoka go tlhaola morafe  le gone go bereka le ba puso sentle  ka seo se ka thusa thata mo go tlhabololeng motse wa gagwe.

Fa a  amogela bogosi, Kgosi Phllip Lorekang  o boletse fa a agetse mosako mafoko a dibui tsotlhe tse di mo  gakolotseng  mme a ba solofetsa gore o tlaa sala morago  tse di molemo go na le bosula. BOKHUTLO