21 Jul 2016

Balemi barui ba kgothaditswe go fetola mekgwa le tlwaelo mo thulaganyong ya go tsamaisa mananeo a temo thuo go itepatepanya le diphetogo tse di tsileng tsa go fetoga ga seemo sa lewapi.

E rile a bula ditshupo tsa temo-thuo tsa kgaolo ya Kweneng Borwa, mookamedi wa Agricultural Marketing Board, Rre Edson Woto a re go botlhokwa go betla methale e mesha e ka yone seemo sa temo-thuo se ka tokafadiwang ka yone go itepatepanya le diphetogo tsa nako eno.

Mookamedi wa BAMB o ne a kgothatsa Batswana go tlhaloganya fa seemo sa go fetoga ga tepo lewapi ele sa sennela ruri ebile go se sepe se seka dirwang go se ema pele.

O ne a rotloetsa balemi go amogela boitsaanape jo bo rotloetsang ka temo ya go somarela bokgola ka go inaakanya le dikgakololo tsa bo maitsanape ka jaana e le tsone di ka thusang go tokafatsa seemo sa thobo.  

Rre Woto a re methale ya go tlhabolola seemo sa temo ka go inaakanya le thulaganyo di tshwana tsa smart agriculture di ka thusa le go rotletsa dipoelo tsa temo ka go dirisa lefatshe le lennye go ntsha thobo ya motia. 

A re barui ba lefatshe leno batshwanela go inaakanya le methale e farologanyeng e ka tthusang go tlhabololang mohama wa temotuo ka jaana ese botlhe ba eka nnang barui kgotsa balemi.

A re thulaganyo ya ditshupo e tshwanetse ya fetoga gore ese nne ya go abalana dikitso fela fela  mme e tsewe ele kgwebo ya go bapatsa kgotsa go ithekisah,tse o di ntshang ole morui go godisa kgwebo ya gago.

Rre Woto one a gatelela mafoko a ga  modulasetilo gore ba ba lebaneng batswe ka methale  e ka thusang go betla ditsela tsa go oketsa tiriso ya lebala la ditshupo ka go oketsa ditiro tse di ka godisang tiriso ya lone go na le go emela nako ya ditshupo fela

Modulasetilo wa ditshupo rre Samuel Mapitse o akgotse go gola ga banana mo go inaakanyeng le mohama wa temo-thuo e godisang itsholelo ya lefatshe leno. 

Rre Mapitse are maiteko a o a banana ke a a tlhokang go rolelwa hutshe ka jaana a thusa thata eseng fela mo go tlhabololeng seemo sa temo-thuo mme gape a dira go le gontsi mo go buleng diphatlha tsa mebereko.

O kaile fa go tshwarwa fa ditshupo go le botlhokwa thata ka jaana ele thulaganyo e haphegileng ya go kopanaya balemi/barui go tla go abalana dikitso kafa mohama oo oka thabologang botoka ka teng.

Ka jalo Modulasetilo Mapitse o gwetlhile morafe wa Bakwena go tswa ka dikitso tse di farologanyeng go iponatsa mme ba thuse go betla ditsela tse di haphegileng tsa kafa lebala la ditshupo la Molepolole la di ekere tse di ka tshwarang 25 di ka dirisiwang botoka ka teng gona le go bereka gangwe mo ngwageng. 

Mapitse o tsweletse a supa matshwenyego a go wela tlase ga disupiwa tsa dijwalo kgathnong le leruo dikgwetlhe tse dinkgoreletsa maiteko a go tsamaitsa thulaganyo eo ka thelelo.

Mo mafokong a kamogelo Kgogi Kgolo ya morafe wa Bakwena kgosi Kgari wa Boraro o supile tlhobaelo ka tshologelo e kwa tlase ya morafe mo tirong eo ya go supa ditswa temong gore e busetsa morago maiteko a go tlhabolola seemo sa temo-thuo mo kgaolong eno. 

Are ditshupo ke thulaganyo e bothokwa ka jaana e kopa baitsaanape ka go farologana go rutana le go anyway maele a kafa seemo sa temo-thuo ya lefatshe leno e ka tlhabologang ka teng. 

bangwe ba balemi ba kgaolo ya Mokwena Rre Masegao Phuduhudu le rre Scara Letina mongwe le mongwe wa bone one a rotloetsa dithupo ka go ntsha kgomo, e enngwe ya tsone eneng ya rafolelwa go direla komiti ya ditshupo letseno la go thusa go itsamaisa. BOKHUTLO