20 Jul 2016

Mosadi mongwe  wa dingwaga  tse di masome a matlhano le bongwe  wa kgotla  ya Bontleng kwa Tsabong o setse a iphotlhere morago ga gore a tsiediwe  ke banna bangwe ba ba ipitsang baporofiti.

Go ya ka mookamela mapodisi a Tsabong, Superintendent Howard Modo,  mongongoregi o boletse fa a kopane  le dilalome tseo mo mmolong wa Tsabong gaufi le banka ya Barcays bosheng.

Mookamela mapodisi a Tsabong o supile fa mme yo a  begetse mapodisi fa dilalome tseo di ne tsa mmolelela fa a na le mathata mme ba eletsa go mo thusa ka ba bontshitswe fa a lwala.

Superintendent  Modo a re mme yo a kaile fa borre bao ba ne ba mo laela go tsamaya le bone go ya  go mo thusetsa kwa sekgweng mme ya re ba tsena koo ba mo laela go ba neela sekgwama gore ba se rapelele. Se ne se na le P910.

Superintendent  Modo o boletse gore maferefere ao a ne gape a laela mosadi yoo gore a ba neele nomore ya sephiri ya gagwe  ya kwa bankeng gore le yone  ba e rapelele  le gore a ye kwa lwapeng lwa  gagwe go ya tsaya mosamo gore ba tle ba kgone go thusa ka fa go tshwanetseng ka teng.

Mme yoo o  a ne a diragatsa ditaelo tsa dilalome tseo ka go ya go tsaya mosamo mme a tsamaya le  monna yo mogwe yo ene a neng a ya go reka letswai go ya go thusa mme yoo.

Mookamela mapodisi a Tsabong a re  mme yoo o boleletse  mapodisi fa rre yo mongwe a ne a sala le sekgwama gore a sale a se rapelela.

Superintendent  Modo a re   mme yoo   o ne a gakgamadiwa ke go supa ga cellphone gore go tserwe P6 000 mo polokelong  ya gagwe  ya banka.

Superintendent Modo  o kaile fa e ne ya re mme yoo  a boa koo  go ya go batla dilalome tseo a fitlhela maloba e le maabane, ka go supegetse fa monna yo a neng a  mo neetse  sekgwama le nomore ya sephiri e le  ene o tsereng madi a otlhe e leng P6 910

Mookamela mapodisi a Tsabong o supile fa mapodisi ba sa ntse ba tsweletse ba le mo patlong ya banna ba babedi bao  mme a kopa setshaba go ba thusa ka go ba  loma tsebe mabapi le go tshwara dilalome tseo.

Mabapi le tiragalo eo, Superintendent Modo o ne a  gakolola setshaba  go nna podi matseba  ka dinako tsotlhe ka manweenwee a a jelang batho madi  ba re ba a ba thusa.
A tlatsa ka go supa  fa ba sepodisi ba dira maiteko otlhe a go tsibosa setshaba ka borukutlhi ka ditsela tse di farologaneng di tshwana le go bopa dikomiti tsa twantsho borukutlhi, diphuthego tsa kgotla,  motshameko wa motshikhinyego mo thelebishining wa “Itshireletse”le  tse dingwe. BOKHUTLHO