05 Jul 2016

Mothusa molaodi wa Maun Rre Sedikwa Motshipi a re go gola ga dikotsi mo motseng wa Maun go okediwa ke go tlhoka tlhokomelo ga dikoloi le tikologo.

 Rre Motshipi a re batsadi bangwe ba tlogelela bana dikoloi ba ithaya ba re ke gone fa baneela bana lorato, fa bangwe ba sa baakanye dikoloi ka tshwanelo.

Rre Motshipi o buile jalo kwa merapelong e e neng e tshwerwe kwa mapalamelong a dikoloi tsa setshaba ka Sontaga kwa dikereke tsa motse wa Maun le ba bogosi baneng ba phuthegetse teng go rapelela dikotsi tsa tsela le dipolaano tsa baratani.

A re botlhokwa jwa go somarela koloi bo tshwana fela le go somarela tlhobolo ya gago, ka koloi le yone e kgona go tlisa matlhotlhapelo a a ka tlisiwang ke tlhobolo fa e sa bewa sentle.

O tsweletse a re fa batsadi ba rata bana ba bone ba ka se ba neele dikoloi ba sena ditlankana tsa go kgweetsa.

A re dikoloi tsa malatsi ano di na le lebelo le le feteletseng mme bangwe ba itepatepanya le tsone ka ba batla go goroga ka bofefo, selo se a reng se baka dintsho tsa dikotsi.

Rre Motshipi o beile sekai ka tsela e e mo Maun, ya Sedie/Matlapana a re bakgweetsi ba tsela eo ka dinako tsotlhe ba siana ka lebelo le le feteletseng, bangwe ele ba dikgwebo tsa di taxi mme ba lebeletse go dira madi eseng pabalesego ya bapagami.

Obile a re Khansele ya bokone bophirima ga e kgone ditiro tsa yone ka bontsi ka e babalelwa ke tiriso ya madi go baakanya dilo di tshwana le mabone a a mo mekgwatheng.

O tsweletse a re le tsone ditsela tsa motse tota ga di a siama mme a re go tlhokafala gore bakgweetsi ba kgweetse ka kelelelo gore ba le ke go fokotsa dikotsi le gone go boloka matshelo a batho.

Okopile bakgweetsi go emisa mokgwa wa go tlhapatsana ka mafoko fa yo mongwe a sa dira sentle, a re ba ithute go tlotlana, a re e re le ntswa ba sepodise ba rile ba oketsa dituelo tsa melato ya tsela, ga go na phethogo e pe mo go ba dira melato. 

Fa a itebaganya le dipolaano, o ne a kopa gore go boelwe fela mo lefokong la Modimo la gore go seka ga ratanwa pele ga lenyalo, go tokafatsa seemo.  O ne a kopa le ba banyetseng go emisa matlo a mannye.

Mogolwane wa mapodise a tsela mo Maun Superintendent Alfred Magudu o ne a lebogela ba bogosi gore ba bo ba dule ka mogopolo wa go nna jalo, a re kana bone e le ba sepodise ga ba kake ba kgona tiro ya gonna jalo ba le nosi, a tlatsa ka gore yone tota e ka kgonwa ke kgetsi ya tsie.

O bile a kgala le bomme ba a reng ba dira dimausu fa thoko ga dikole mme go tswa foo ba rekisetse bana motokwane le tse dingwe tse di dirang gore ditlhaloganyo tsa bone di seka tsa bereka sentle.

A re ka ngwaga wa 2014, go tlhokafetse batho ba le 22 mo ditseleng tsa kgaolo ya Maun, fa ba ba kgweetsang ka lebelo le le kwa godimo bone e le 4 306, ba ba kgweetsang ba nole ba le 347 ka 2015, go tlhokafetse ba le 18. Ka firikgong go fitlhela Motsheganong ngwaga ono, ba bojalwa ba ne ba le 418, fa ba mabelo e le 4 409 mme ga tlhokafala ba le 13. A re dipalotse fa di tlhakanngwa motho o ka bona gore ba na lekgwetlho e tona mo kgaolong ya Maun. Mme a re sebe sa phiri ke bojalwa jo bo nowang. O tsweletse a re le marekisetso a bojalwa a mantsi thata.

Mothusa Kgosi, Rre Pringle Dithapo o tlhalositse fa tota bone bane ba gwetlhega e le ba bogosi morago ga dikotsi tse dineng tsa gapa matshelo a batho kwa metseng ya Samedupe, Shakawe le e mengwe.

Mme a re ba ne baipotsa gore a go leofile morwa motho ka na jang, ke gone ba tswa ka tharabololo ya gore ba laletse ba dikereke go kopanela le bone tiro eo, a re gongwe modimo o ka ba utlwela botlhoko. BOKHUTLO