13 Sep 2015

Modulasetilo wa komiti e e tsamaisang metshameko ya dikgaolo tsa botlhophi, Rre Ontuetse Kenosi o boletse fa lenaneo leo la  go leka go ntsha banana mo mekgwatheng ka metshameko go lebega le tswa tema ka banana ba inaakantse le metshameko ka botswapelo.

Rre Kenosi o tlhalositse mo potsolotsong fa metshameko e,  e tsisitse botsalano ga mmogo le go ananya dikitso mo kgaolong ka bophara.

Rre Kenosi o tlhalositse fa go tlhoka tsebe ga banana go lebega go ile tlase ka banana ba inaakantse le metshameko. A re  go supega fa talente e le teng mo kgaolong ka bana le bone ba supa kgatlhego. O tsweletse ka go supa fa tirisano ya bone le beng ba ditlhopha e le ya maemo a ntlha ka ba supa kemo nokeng e bile e le bone ba ba gakololang fa dilo di sa tsamae sentle. 

A re tshwaragano e, e dira gore tiro ya bone e nne motlhofo. 

O kaile fa dikgwetlho tse ba kopanang le tsone mo go tsamaiseng metshameko e le ditlhopha dingwe tse di ikgatholosang tsamaiso jaaka go dirisa bana ba  dikole ga mmogo le batshameki ba ba tshamekelang ditlhopha tse di kgolwane.  

E rile a tswa la kgothatso Rre Kenosi a kopa ditlhopha go tsaya lenaneo le ka tlhwaafalo ka le ka ba ntsha mo lehumeng ga mmogo le gone go ba batlela tiro. Bokhutlo