16 Mar 2015

Lenaneo la nyeletso lehuma le gatetse pele kwa Serinane mo kgaolong potlana ya Letlhakeng.

Se, se supilwe ke kgosi ya motse oo, Rre Malang Galoatle mo potsolotsong le ba lekalana la dikgang bosheng. Rre Galoatle o supile fa manano a a dirang sentle kwa motseng oo a akaretsa dimausu, dihutshane le ditshingwana tsa merogo.

Kgosi Galoatle o ne a tswelela ka go supa fa a sa itumelele khamphani ya metsi ya Water Utilities. O supile fa badiri ba Water Utilities ba kgona go kgaola metsi le dipompo ba sa ba rerisa ele boeleteledipele jwa motse. O ne a supa gape fa a itumeletse banni ba motse oo gobo bas a senye dipompo.

Kgosi o tsweletse ka go supa a sa itumelele leruo le le sailang mo motseng. O ne a tlhalosa fa ba tlaa tseela barui ba ba tlogelang leruo la bone le gobeya mo motseng dikgato tse di maleba

O ne a tswelala ka go galaletsa komiti ya ditlhabololo ya motse oo ka e ikemiseditse go tlhabolola motse wa Serinane. O ne a supa fa a tlhoka koloi ya kgotla gammogo le ofisi ya kgotla.Kgosi Galoatle o supile fa ba dirisa ntlwana e e kamore dipedi e ba e adimilweng ke ba komiti ya ditlhabololo go e dirisa le mapodisi ga mmogo le mokwaledi. O kaile fa mapodisi ba thusa motho kana mokwaledi o tswanetse a ba thibogela kana ene fa a thusa motho mokwaledi le mapodisi gare ba mo thibogele.

O tsweletse ka go supa fa gona le tlhaelo ya matlo a bodiredi kwa motseng oo.O ne a supa fa borukhitlhi bo ile kwa tlase kwa Serinane.O kaile gape fa ba ba rekisang majalwa a Setswana le bone ba setse molao wa thekiso ya majalwa morago.

Fa a latlhela la gagwe leloko la komiti ya ditlhabolo ya motse oo Mme Kolobetso Lekololwane o supile fa ipelegeng e ba thusitse ka go dira ditiro dingwe mo motseng oo. O ne a supa fa ba agile matlwana a boiteketso ale mabedi ka lenaneo leo kwa kgotleng. O ne gape asupa fa ba tsweletse ka kago ya ntlo ya modiro wa LA2 ya modiredi wa boipelego gammogo le go rema ditsela tse di tswang mo Serinane go ya kwa Betesankwe le Matswi.

O ne a tsweletsa ka go supa fa komiti ya bone e tsenya madi ka go hirisa matlo a boroko gaamogo le go rekisa ditena Mme Lekololwane o supile fa ba itumelela gobo bahirisi ba matlo ao ba duela sentle.
O ne gape a supa fa ba akola lenaneo la Nteletsa 2 ka seo se ba kgaotse motsamao ka gore ba dira meriti gaufi. BOKHUTLO