04 Mar 2015

Kgosi Albert Moitoi wa Leshibitse o tlhokafetse morago ga go kubugelwa ke bolwetse mo bekeng e e fetileng.

E rile kgosi George Thwane wa Artesia a latola Kgosi Moitoi, a tlhalosa fa e ne ya re ka Labone wa beke e e fetileng (26/02/2015) a ragosediwa kwa kokelong ya Artesia ka diamaramara mme morago a fetisediwang kwa Bokamoso Private Hospital.

Kgosi Thwane a re e ne ya re mo mosong wa letsatsi le le latelang la Labotlhano (27/02/2015) ba latolelwa Kgosi Moitoi.

A re e ne ya re mo letsatsing la Labobedi (03/03/2015) ba ya go latolela morafe kgosi ya bone mme a supa fa seo e le tsamaiso ya Setswana gore fa kgosi a tlhokafatse o latolelwa kwa kgotleng gore morafe o boloke kgosi ya bone. 

Kgosi Thwane a re go botlhokwa thata gore mo nakong ya kutlobotlhoko e e apereng batho ba motse wa Leshibitse go nne le thitibalo le kagiso mme a kopa banana go itshwara sentle.

A re dithulaganyo tsa phitlho di tsweletse mme Kgosi Moitoi o tlaa bolokwa ka Matlhatso (07/03/3015) go ne kwa motseng wa gagwe.

O ne a tlatsa ka gore e tlaa re gompieno ba dire tirelo ya segopotso sa ga Kgosi Moitoi kwa kgotleng ya motse oo. BOKHUTLO