09 Feb 2015

Sekolo se sebotlana sa Gxhabara kwa Maun se ne se ipelela moletlo wa keresemose bosheng entswa e sa bolo go feta. Sekole se na le baithuti ba ba s tlhokileng lesego mo botshelong.

Barulaganyi ba tlhalositse fa ba ne ba tlhoka go dira moletlo oo ka kgwedi ya Sedimontlhole ka letsatsi la keresemose ka mabaka a gore dikolo di ne di tswetse gape ba emetse madi go tswa barotloetsing.

Morutabana wa tsa bokaedi, Mme Tlotlego Sephunya o ne a supa fa moletlo wa go nna jalo o le botlhokwa ka o tlisa boitumelo mo baneng bao.

Mme Sephunya o ne a re maikaelelo a bone ele barutabana ba tshwaraganye le batsadi e le go godisa bana bao sentle ka bangwe ba bone ba senang batsadi, le go ba rotloetsa gore ba ithute that aba tsoge ba le bangwe mo sechabeng.

Moletlo oo o ne o rotloeditswe ka madi a a kanang ka P12 000 mme ban aba ba tlhokileng lesego b aba tshwarang palo ya lekgolo ba abelwa dimpho tse di akaretseng di dirisiwa tsa go tlhapa.

E rile a bua kwa moletlong oo, moemedi wa barotloetsi rre Bapadile Kamanakao yo o berekang kwa komponing ya Wilderness a tlhalosa fa moletlo oo o diretswe gore ban aba ba tlhokileng lesego ba bone fa ba amogelesega mo sechabeng.Rre Kamakao o ne gape a gwetlha batlhokomedi ba bana bao gore b aba fe lorato, b aba thuse le tiro ya sekolo.

Mo go tse dingwe rre Kamakao o ne a rotloetse ban aba Gxhabara go ithuta ka tshomarelo diphologolo ka e le botlhokwa.

O ne a re ba ditirelo tsa Bojanala ka go farologana ba hira Batswana b aka tshwara masome a mane le botlhano (45%).

Ka jalo rre Kamanakao o ne a supa fa go ngomola pelo go bo batho ka bontsi ba inaakantse le bogodu jwa diphologolo tsa naga, mo a reng go ama ditiro tsa Bojanala, mme o ne a leboga Tautona wa lefatshe leno ka a le kgatlhanong le go utswa le go bolaya diphologolo tsa naga setlhogo.  BOKHUTLO