03 Feb 2015

Mogolwane wa mapodisi a Kanye, Superintendent Kealositse Konyana a re go ipolaya ga se tharabololo ya mathata.

Superintendent Konyana o buile mafoko a mo potsolosong morago ga gore lekawana la dingwaga tse di masome mararo le bongwe la Lotlhakane East le ikgapele botshelo ka go ikaletsa bosheng.

A re lekawana leo le ne le na le kgang le mapodisi selo se a reng ga a itse gore a se ka tswa e le sone se bakileng tiragalo e ya go ikgapela botshelo ga lekawana le. Superintendent Konyana a re lekawana le e rile bosheng la tlhaba mokapelo wa lone ka thipa, mme a supa fa le sa tlogela molaetsa ope.

 A re  lekawana leo le ikaleditse mo ntlong ya ga kgatsadie ee sa nneng ope  mme ka  lesego a begwa  ke mongwe yo o neng a batla sengwe kwa lwapeng leo  maabane.

 A re lekawana leo le dirisitse waere go ikaletsa e bile go lebega le ikaleditse ka Matlhatso, mme ngaka e tlhomamisitse fa a tlhokafetse. Superintendent Konyana a re fa batho ba na le mathata ba ne ba begela batsadi kgotsa ba bona bangwe ba molao ba tshwana le mapodise,ba boipelego, dikgosi le baruti a tla a re go ikgapela botshelo ke boleo.

 Fa dikgang di eme jalo mapodise a Kanye a tshegeditse lekawana la dingwaga tse di masome a mabedi le botlhano le ene e le wa Lotlhakane East ka molato wa go itaya monna wa dingwaga tse di masome a marataro le boraro ka logong a bo a mo gobatsa.

Superintendent Konyana a re tiragalo e e diragetse ka Sontaga teng kwa Lotlhakane morago ga gore bobedi jo bo tlhoke kutlwisisano kwa masimo, mme morago rre yoo a tsaya fa kgang e fedile a bo a ya gae kwa mosimane a fetileng a mo iteela teng.

 A re kgang e simologile fa monnamogolo a kgalemelela wa mosimane go tlhapatsa yo mongwe wa molekane wa gagwe, a re kwa morago mosimane o ne a itaya monnamogolo a mo fitlhela kwa gae. Gontse go le foo batho ba erileng mo bosheng ba gobatsa Kgosi Searobi wa Lotlhakane ba tlaa sekisiwa. BOKHUTLO