22 Jan 2015

Banni ba Tewane le ba kgotla ya Xhosa 2 kwa kgaolong ya Mahalapye Bophirima, ba lela ka tlhaelo ya ditlamelo tse di akaretsang letlhoko la boroko jwa badirelapuso, tlhaelo ya metsi le motakase mo metsing ya bone.

Ba ntshitse selelo se mo diphuthegong tse di neng di buisiwa ke mopalamente wa bone Rre Joseph Molefhe ka labobedi wa beke eno, tse mo go tsone a neng a lekodisa batlhophi ba kgaolo ya gagwe ka melao le megopolo e neng ya bewa Palamante pele.

Kwa Tewane ba boleletse mopalamente fa ba tlhaelela ke ditlamelo ditshwana letlhoko la motakase, tlhaelo ya metsi, koloi ya kokelwana, letlhoko la mapodise le mokwaledi wa kgotla, tlhaelo ya matlwana a borutelo mo sekoleng se sebotlana, ditsela tse di sa siamang mo motsing le letlhoko la dikgosana tsa tetlanyo. 

Modulasetilo wa komiti ya ditlhabololo tsa motse wa Tewane Mmaetsho Kgomotso Mogaetsho, a re tlhaelo ya ditlamelo tsa go nna jalo e kgoreletsa bagwebi go tla go simolola dikgwebo kwa motsing wa bone le go paledisa badirelapuso go dira tiro ya bone ka manontlhotlho.

Mo Xhosa 2 modulasetilo wa komiti ya ditlhabololo tsa kgaolwana eo Rre Orelebile Baatweng o boletse fa ba lebanwe ke kgwetlho ya go tlhaelelwa ke metsi, letlhoko la dipone tsa ditsela tsa mekgwatlhe, ditsela tse di sa siamang ntateng ya dikhuti, letlhoko la diofisi tsa kgotla le leobo mo kgotleng ya Bokaa gammogo le letlhoko la ditiro ga banana segolo jang ba ba feditseng dithuto tsa bone kwa mmadikole le mo dikoleng tsa ithutelo ditiro tsa diatla ba jaanong go bolelwang ba lwela ditiro tsa Ipelegeng le bagolo.

Mo diphuthegong tseo banni ba Tewane le Xhosa 2 bane ba supa lekgotlana la kabo ditsha la Mahalapye ka monwana, ka se ba se biditseng go palelwa ke go abela batho ditsha tsa bonno le dikgwebo ka nako e tshwanetseng e bile ba kgalela badiri ba lekgotlana la kabo ditsha go palelwa ke go phimola dikeledi batho ba ba neng ba hudusetswa kwa Flowertonw morago ga gore malwapa a bone a amiwe ke ditlhabololo tse di neng di dirwa mo motsing wa Mahalapye.

Ba tsweletse ka go kopa makgotlana a kabo ditsha lefatshe leno ka bophara go dirisana le koporase ya Botswana Power Corporation le koporase ya Water Utilities fa ba aba ditsha tsa bonno ka jaana fa batho fa ba thibelelang teng go tlhokega motakase,metsi le ditsela.

Ene e rile gole pele kgosi Edwin Lopang wa Xhosa 2 le kgosi Kerapetse Kalanke wa Tewane ba amogela mopalamente le lekoko la gagwe, ba supa fa ba tshwentswe ke borukithi jwa go thujwa ga dikgwebo, go kgothoswa ga batho dithoto masigo,go utswiwa ga dikoko masigo go robetswe mo dikgotlaneng tsa Xhosa 2 le Zola gammogo le bogodu jwa loruo.

Bare ere ka bogodu jwa dikgomo le dikoko bo ile magoletsa go mo maruding a Mmuso go gagamatsa molao ka go oketsa dikatholo tsa bogodu jwa loruo le gore ditsheko tsa loruo jaanong di sekelwe mo makgotleng a Setswana.

E rile Rre Molefhe yo a neng a patilwe ke makhanselara a kgaolo ya gagwe le Badirelapuso gammogo le modulasetilo wa khansele ya kgaolo potlana ya Mahalapye Rre Tassman Cebani a akgwa banni ba metse eo dikgaba, a ba solofetsa fa a tla ikopanya le bagolwane ba maphata a amegang go rarabolola dikgang tsa go nna jalo ka jaana di kokonela matshelo a bone.BOKHUTLO