15 Jan 2015

Baeteledipele ba khamphani e e magorogo masha ya Botsogopele Environmental Cleaning Services e bong Rre Tapson Fane le Mme Motlalepula Baaname ba dipelo di botlhoko.

Ba re se, sedirwa ke gore khamphani ya bone ga e ise e simolole go ntsha ditirelo tsa yone tse ba di solofeditseng banni ba motse wa Masunga le e e mabapi.  Mo potsolotsong le lekala la dikgang ka Mosupologo, Rre Fane a re go tlhoka go itse tsamaiso e e salwang morago fa go bulwa kgwebo ya phepafatso go ba jeseditse mo lesweng.

A re ba ne ba solofetse gore mo nakong ya gompieno ba tla bo ba semeletse ba dira matshebetshebe a madi ka e bile malwapa ka bontsi a tlhokana le phepafatso ka a tlhogile tlhaga. Khamphani eo e tlhamilwe ka dithuso tsa lenaneo la nyeletso lehuma ngwaga o o fetileng ka kgwedi ya Morule. 

Rre Fane le Mme Baaname ba ne ba filwe madi a a kanang ka P13 818 mongwe le mongwe wa bone ka jalo ba kgonne go ithekela didirisiwa tse ba tla di dirisang go phepafatsa le go ntsha ditirelo tsa bone ka go farologana.

O tlhalositse fa khamphani ya bone e ne e itlamile go dira ditirelo di tshwana le go phepafatsa diofisi, matlo, go kuba mo malwapeng, go tlhatswa ditilo, mebete, dikoloi, dijana mo malwapeng, matlwana a boitiketso ga mmogo le gone go sela matlakala mo tikologong.

Rre Fane a re ka jalo ba ne ba ikaeletse gore ba simolola ditirelo tseo morago ga go reka tsotlhe tse di tlhokafalang, mme ga retela ka ditsamaiso dingwe di ne di saletse morago.

A re go ya ka tebo ya matlho, tikologo ya motse wa Masunga e tlhoka ditirelo tsa bone, segolo jang ka bontsi jwa banni ba motse oo le e e mabapi ba lebega ba seke ba phepafatsa malwapa a bone fa bangwe ba tlhola kwa ditirong. 

O tladitse ka gore gape ke bone fela ba kgwebo ya mofuta o mo motseng oo mme a re ba ne ba sa itse fa go ne go tlhokega gore ba nne le ofisi ga mmogo le lone lefelo le ba tla beelang didirisiwa tsa bone, segolo jang ka ba bereka ka dilo tse di monko o o bogale. 

Rre Fane o tsweletse ka gore ba santse ba na le kgwetlho eo ya go dira teseletso ya kgwebo ya bone ka ba santse ba tlhoka lone lefelo, ka jalo ba ka se kgone go ntsha ditirelo dipe tsa bone ka go dira kgwebo ntle le teseletso ka go le kgatlhanong le molao wa ba khansele.

A re ka jalo, ba tshwanelwa ke go leta le ntswa ba sa itse gore ba tla leta lebaka le le kae go diragatsa yone kopo e ba e lopilweng ke ba ofisi ya tlhokomelo tikologo. 

O tsweletse ka gore ba tshogetse fela gore gongwe didirisiwa tsa bone tse dingwe di tloga di siiwa ke nako mme go ba bakele ditshenyegelo tse di masisi ka ba ise ba simolole go nwa kgwebo ya bone moro.

Rre Fane a re ba ne ba solofetse go le gontsi mo kgwebong ya bone ka ba ne ba dirile dipatlisiso tsa mmaraka mme ba itemogela fa setshaba sa kgaolo ya Bokone Botlhaba se na le letlhoko le lentsi la phepafatso.

E rile a tswa la gagwe, Mme Baaname o tlhalositse fa kgwebo e ,e tla fetola matshelo a bone e bile e tla ba ntsha mo lehumeng ka e tla bo e anamisitse ditirelo tsa yone le kgaolo yotlhe, go akarediwa le kwa toropong ya Francistown ga mmogo le lone lefatshe ka bophara. 

A re fa ba ka diega go thusiwa go dira teseletso go tla baka gore mongwe kgotsa setlhopha se sengwe se tlhame kgwebo e e tshwanang le ya bone, mme ka jalo go ba bakele phadisanyo.

Mme Beverly Ngoni go tswa kwa ofising ya lenaneo la nyeletso lehuma o tlhalositse fa go kopana le dikgwetlho mo kgwebong go sa tshwanela go kgoba bagwebi marapo. 

O rotloeditse ba kgwebo ya Botsogopele le ba bangwe ba ba tla dirang kgwebo ya mofuta o, go nna ba ikgolaganya le bone go kopa dikgakololo tse di maleba. 

A re dikgwebo tsa nyeletso lehuma, ke dikgwebo tse di potlana tse motho a kgonang go di direla mo lapeng go itshetsa.

Mme Ngoni a re bagwebi bangwe ba kgona go kopa dithuso tsa lenaneo leo ba ya go simolola dikgwebo tse ditona tse di tlhokang ditsamaiso dingwe tse di faphegileng, mme seo se ba patike go sala morago ditsetlana tse di beilweng tebang le dikgwebo tse di tona.

O gakolotse ba Botsogopele go simolola ba neela ditirelo tse di potlana jaaka gone go kuba mo malapeng, go phepafatsa matlo gore ba kgone go dira matsana go lomaganya fa ba tlhaelelwang teng. 

A re ba tla nna ba ba eme nokeng go ba thusa go diragatsa ditoro tsa bone mme mo nakong e e tlang ba tla ikgolaganya le ba ofisi ya tlhokomelo tikologo, segolo jang ka nako ya dithutuntsho go rutuntsha bagwebi ba bone ka tsotlhe tse ofisi ya bone e di tlhokang.  BOKHUTLO