11 Jan 2015

Monna wa dingwaga tse masome a mararo wa Bobonong o thusa mapodise a Bobonong mabapi le go fitlhelwa ka dikgomo di le lesome le botlhano tse go belaesegang e le tsa bogodu.

Go ya ka mogolwane wa Mapodise a Bobonong, Rre Michael Maphephu o tlhalositse fa mmelaelwa a tshwerwe ka dikgomo di le boferabobedi le dinamane di le supa di tshubilwe ka ditshipi tse dintsi tse e bileng di dirile dintho tse di masisi maikaelelo e le gore fa dintho tseo di fola a bo a di tshuba ka tshipi e e leng ya gagwe.

Rre Maphephu a re go belaelwa fa dikgomo tseo e le tsa barui bangwe ba meraka ya Ranthase le Nchimane e e bapileng le Bobonong.

O kopile barui ba kgaolo ya bobirwa ba ba latlhegetsweng ke dikgomo go tla go bona dikgomo tseo. Rre Maphephu a re ba santse ba tsweletse ka ditlhotlhomiso.

E re dikgang di eme jalo Rre Maphephu o supile fa ba dirile setlhopha sa mapodise se se tlang tsamayang le kgaolo ya bobirwa go phutha dikgomo tse go belaesegang e le tsa bogodu. BOKHUTLO