21 Feb 2013

Boitshwaro jwa banwi ba bojalwa jwa setopoti le morula kwa Tswapong borwa bo kailwe bo le kwa tlase fela thata.

Mookamela mapodisi a Machaneng, Superintendant Peggy Vakalisa o tlhalositse gore dipego tsa botho jo bo sa amogelesegeng morago ga go nwa majalwa ao ga di kgale kwa ofising ya sepodisi.

A re dipego tse ba di amogelang thata ke tsa dititeo le dikomano. Superintendant Vakalisa o ne a tswelela ka gore ga go bonolo go laola seemo ka gore majalwa ao a kgona go itirelwa fela ke mongwe le mongwe ka a sa tlhoke sepe se sentsi, mme bangwe ba kgona go felela ba a a nwa pele le morago ga dinako tse di beilweng. 

O tlhalositse fa bojalwa jwa setopoti bo ka kgona go itirelwa ke mang le mang yo o nang le magapu ka bo tlhokana le one fela le gore jwa morula bo botlhofo ka bo dirwa ka morula o e bileng o atile thata mo kgaolong.

Kgosi Shadreck Sarona wa Machaneng o ne a tlatsa ka gore mo motseng wa gagwe, botlhoka tsebe jwa banwi ba setopoti le morula bo gola letsatsi le letsatsi. A re dintwa tse di bakang dikgobalo tse di masisi le go tlhapatsana morago ga go nwa ga di mo jese diwelang. 

O ne a kgala bagwebi ba a reng ba rekisetsa bana ba dingwaga tse di kwa tlase majalwa. A re dipego di supile fa bangwe bagwebi ba dirisana thata le bana bao ka ba kgona go ba fitlha mo matlong gore ba nwele teng. ENDS