15 Apr 2014

Bagodi,  bagaka ba pele ba ntwa ya lefatshe, batlhoki  le  dikhutsana, ba tla a direlwa karata ya poso go tokafatsa tsamaiso e e leng teng ya dituelo.

Mafoko a, a boletswe ke mogolwane wa posong ya Tlokweng, Rre Booster Nkhomba, jaaka a ne a buisa Batlokwa  kwa  phuthegong ya kgotla ka Matlhatso. 

Rre Nkhomba, o supile fa mo karateng  eo  ya   maranyane,  go  tla  a  dirisiwa  monwana wa mong  wa  karata,   mme  e  tla  a  fela   morago   ga  dingwaga   tse di  lesome. 

O ne a tswelela ka go tlhalosa gore fa go ka diragala gore karata e  latlhege  kana  e  robege,  mong  wa   yone o   tlamega   go   ntsha  P22.00   go  dira  e  ntsha.

O boletse gore batho ba ba amegang mme ba le kwa dipateleng bone ba na le thulaganyo ya go ka ba thusa. 

Nkhomba o kaile fa ka karata e, badirisi ba yone ba ka kgona go tlogela madi mo go yone; go reka ditirelo tsa motlakase le tsa metsi mme botlhe ba ba amegang ba kopiwa go ikwadisetsa go direlwa karata e, kgwedi eno e le masome a mabedi le boraro, go fitlha ya Motsheganong e le masome a mabedi le bone. 

O supile fa ba kopanye le dikgwetlho tse dintsi tsa go sa babalesegeng ga bukana e e ntseng e dirisiwa, ka jalo ba tla ka mogopolo o mosha wa go ba direla karata e e tshwanang le ya banka, mme modirisi a tla a tsewa menwana yotlhe ya diatla, gore fa monwana mongwe o ba fa bothata go dirisiwe e mengwe.

O tlhalositse fa ba tla a tlhoka karata ya Omang go dira karata e, mme ka nako tsotlhe modirisi wa karata a tlamega go dirisa monwana go tsaya ditirelo fa dithulaganyo tse dingwe tse di leng teng tsa dituelo, di sa fetoga. 

Rre Nkhomba o boletse gape gore fa  mong wa karata a tlhokafetse   mme a tlogetse madi mo karateng, ba ba setseng ba tlaa supa yo o tlaa tsayang madi ao.

Erile ba mo kgwa kgaba, batsena phuthego ba supa fa ba tshwenngwa ke mela e meleele kwa   posong, mme ba kopa go agelwa matlwana a boitiketso kwa posong. Ba supile fa ba atla mogopolo wa go direlwa dikarata ka ba solofela fa o tla a fefosa ditirelo.Bokhutlo