07 Apr 2014

Morui mongwe wa  Kang, Rre Henry Maapatsane o ntshitse dikgomo dile pedi go neela barui ba ba  mo mafelong a a amilweng ke  bolwetse jwa tlhako le molomo.

Fa a bua ka nako ya go amogela dikgomo tseo semmuso, molomaganyi wa tsa temo-thuo kwa Kgalagadi, Rre Joel Nkaikwa o boletse fa kgato e e tserweng ke ba lelwapa la ga Maapatsane ele e e tsamaelanang le pilara ya Tebelopele ya 2016 ya  setshaba se se lerato, e bile se kgathala ka ba bangwe.

O galaleditse Rre Maapatsane go bona fa go le botlhokwa go fa  ba ba seng lesego ka ntlha ya go tlhagoga ga bolwetse jwa tlhako le molomo. Rre Nkaikwa o kopile barui ba bangwe go thusa puso ka dikgomo gore tiro ya  go busetsa  leruo le le bolailweng ka nako ya bolwetse jwa tlhako le molomo e atlege.

Fa a ntsha la gagwe Kgosi Morabeng Phori wa Kang o ntshitse malebo mo tirong e ntle e e dirilweng ke ba lelwapa la ga Maapatsane. A re,  ke maikarabelo a Motswana mongwe le mongwe yo  o kgonang go thusa puso go nale go nna fela go solofetswe thuso mo go yone.

Kgosi Phori a re,  kgaolo ya Kgalagadi e segofaditswe ka ga e mo go tse di amilweng ke bolwetse jwa  tlhako le molomo. Rre Maapatsane a re, ba lelwapa la gagwe ba itumeletse go bo ba ntshitse bonnyenyane jo ba nang le jone go thusa puso.

A re, ba mo bohutsaneng  le  batho ba ba  amilweng ke bolwetse jo, jalo ba bona go tshwanelwa go aba le go thusa puso mo go busetseng dikgomo tsa ba ba amegileng.

Le fa go ntse jalo, molomaganyi wa lenaneno la go busetsa batswa- setlhabelo leruo, Rre Thomas Tadubana le ene o supile malebo mo mphong eo, a tlhalosa fa  go busetsa leruo kwa kgaolong ya Zone 7 go feditswe jalo go itebagantswe le Zone 6.

Rre Tadubana a re, tiro ya go busetsa dipodi mo dikgaolong tse di amegileng ke yone  e e  saletseng morago. BOKHUTLO