01 Apr 2014

Mothusa modulasetilo wa kereke ya UCCSA mo kgaolong ya Legare Bokone, Moruti Caxton Mosiakgabo, o kgadile baruti ba dikereke dingwe ba go bolelwang fa ba tlhakanela dikobo le basetsanyana ba dingwaga tse di kwa tlase.

Moruti Mosiakgabo yo e neng ele sebui sa tlotla kwa pulong semmuso ya kgotla ya Setswana e agilweng ke borre ba kereke ya UCCSA kwa Radisele ka mafelo a beke, o boleletse balatedi ba kereke eo ba ba neng ba tswa kwa dikgaolong tsa Orapa, Serowe, Palapye, Pilikwe, Ramokgonami, Shoshong, Mmutlane, Kalamare le Mahalapye fa baruti ba sebopego seo ba tshwanetswe ke go tseelwa dikgato tse di gagametseng ka jaana ba gogagoga leina la kereke le Modimo mo seretseng.

A re gole gantsi go thubega kana go phatlalala ga diphuthego tsa dikereke go bakwa ke ditiro di tshwana le go tlhakanela dikobo le bana ba bannye ga baruti, go ratana le basadi ba ba farologaneng ga baruti, go lwela maemo ga baeteledipele ba dikereke, go itirisetsa madi a diphuthego le go tlhoka go tshephana ga baeteledipele mo dikerekeng.

Moruti Mosiakgabo o kopile botlhe ba ba neilweng boikarabelo jwa go etelela pele dikereke tsa UCCSA mo Botswana go nna sekao mo dikerekeng tse dingwe ka go itshwara ka mokgwa o eletsegang le go ikgapha mo ditirong tse di makgaphila tse a tlhalositseng fa di ka kgaoganya dikereke tsa bone ka makgamu.

O iteetse borre ba Kereke ya UCCSA kwa Radisele letsogo ka go ithaopela go aga lekgotla la Setswana mo dikagong tsa kereke eo, a bolela fa go dira jalo ele go tsosolosa ngwao e go lebegang e nyelela ka monokela. 

A re se se dirilweng ke borre ba Kereke ya UCCSA kwa Radisele ke se se dirilweng ke Morena Keresete yo a neng a aga kgotla mo lefelong le go agilweng Kereke mo go lone.

E ne e rile gole pele, mokhanselara wa kgaolwana ya Radisele, e bile ele modulasetilo wa borre ba kereke ya UCCSA, Rre Michael Motshedi, a tlhalosa fa mangwe a maikaelelo a bone ele go agela moruti wa kereke eo le mongwe wa batlhoki matlo a boroko, ele tsela nngwe ya go tsweledisa toro ya lefatshe leno ya ngwaga wa 2016, ya go nna tshaba e kutlwelobotlhoko e bile ele tshaba e kgathalang ka matshelo a batho ba yone. 

Rre Motshedi a re le fa tiro eo ya kago ya kgotla ene e dirwa ke borre, gone o itumelela kemo nokeng e ba neng ba e neelwa ke bomme ba kereke eo.

Bangwe ba dibui kwa letsatsing leo ene ele Moruti Boikobo Nathobatsang le Kgosi Mokeresete Ntebele, ba ka bobedi jwa bone ba neng ba otlelela mafoko aga Rre Mosiakgabo ka go kgala baeteledipele ba ba dirang dilo ka tshokamo le go lwela maemo mo go felelang go kgaogantse dikereke.

Bangwe ba ba neng ba nna le seabe kwa moletlong oo ke Rre Kesiametswe Gabaake, Kgosana ya Mmapetlwana, Rre Abraham Thuto le Kgosi Ntebele, ba ba neng ba nna le sebaka sa go jwala ditlhare tsa meriti mo kerekeng eo. 

Batho ba ba neng ba tsene moletlo oo ba tswa mo dikgaolong gammogo le mo dikerekeng tse di farologaneng ba ne ba solofetsa fa ba tla thusa ka madi le didirisiwa tsa kago ditshwana semente le dipolanka tsa kago gore maikaelelo a go tsweledisa kago ya nto ya ga moruti le motlhoki a atlega. Bokhutlo